Hindistonda «Nipax» virusi birinchi o‘limga sabab bo‘ldi

Hindistonda xavfli «Nipax» virusi bilan bog‘liq birinchi o‘lim holati tasdiqlandi. Bu haqda Zamin.uz xabar berdi.

Ma’lumotlarga ko‘ra, Kalkutta shahrida yashovchi bir ayolning sog‘ligi yomonlashgan, u shifoxonaga yotqizilgan, ammo shifokorlarning barcha sa’y-harakatlariga qaramay, hayotdan ko‘z yumgan. Ushbu holat ortidan mamlakatda virusning tarqalishini oldini olish maqsadida favqulodda choralar ko‘rilmoqda.

Xususan, yuzlab fuqarolar karantinga olingan, tibbiy nazorat kuchaytirilgan va virus bilan aloqada bo‘lishi mumkin bo‘lgan shaxslar sinchkovlik bilan tekshirilmoqda. Shuningdek, Hindistondan tashqarida ham ehtiyot choralar ko‘rilmoqda.

Masalan, Tailand hukumati Hindistondan kelayotgan yo‘lovchilarni aeroportlarda qat’iy sanitariya nazoratidan o‘tkazmoqda. Yo‘lovchilar virusga xos alomatlar bo‘yicha tekshirilib, zarur hollarda tibbiy kuzatuvga olinmoqda.

Mutaxassislarning ta’kidlashicha, «Nipax» virusi jiddiy xavf tug‘diradi. Shuning uchun barcha fuqarolar shaxsiy gigiyena qoidalariga qat’iy rioya qilishi, odamlar bilan keraksiz muloqotlardan saqlanishi va zarurat tug‘ilganda tibbiy yordamga murojaat qilishi lozim.

Mutasaddilar vaziyatni nazorat qilish uchun qo‘shimcha chora-tadbirlarni amalga oshirishda davom etmoqda.