AQShda saqlanayotgan o‘zbekistonliklarga elchixona yordam bermoqda
O‘zbekistonning AQShdagi elchixonasi diplomatlari Virjiniya shtatidagi vaqtincha saqlash markazlarida bo‘lib, u yerda saqlanayotgan o‘zbekistonliklar bilan uchrashdi. Bu haqda Zamin.uz xabar berdi.
Ushbu shaxslar AQSh hududida noqonuniy qolib ketgani sababli deportatsiya qarorini kutmoqda va qaytish jarayonini tezlashtirish bo‘yicha yordam so‘ragan. "Dunyo" axborotiga ko‘ra, elchixona vakillari fuqarolarning saqlanish sharoitlari, sog‘lig‘i va yashash holatini o‘rganib, ularga konsullik va huquqiy masalalar yuzasidan tushuntirish bergan.
Diplomatik missiya zarur hujjatlarni rasmiylashtirishda ko‘mak berib, ularni imkon qadar tezroq O‘zbekistonga qaytarish uchun yordam ko‘rsatishini bildirgan. AQSh immigratsiya siyosatidagi so‘nggi o‘zgarishlar munosabati bilan elchixona mamlakatda yashayotgan o‘zbekistonliklarni migratsiya qonunlariga qat’iy rioya qilishga va noqonuniy faoliyatdan tiyilishga chaqirdi.
Zarurat tug‘ilganda, fuqarolar O‘zbekiston elchixonasining Vashingtondagi konsullik bo‘limiga +1 (202) 887-5300 telefon raqami yoki consul.washington@mfa.uz elektron manzili orqali murojaat qilishlari mumkin. Avvalroq, migratsiya qoidalarini buzganligi sababli AQShdan deportatsiya qilingan 40 dan ortiq O‘zbekiston fuqarosi Toshkentga yetib kelgani haqida xabar berilgan edi.
