Fil rossiyalik sayyohlar mashinasiga hujum qildi
Rossiyalik sayyohlar Shri-Lankada ta’til paytida xavfli holatga duch kelishdi. Bu haqda Zamin.uz xabar berdi.
Ularning ijaraga olingan avtomobiliga fil hujum qildi. Bu voqea ijtimoiy tarmoqlarda keng muhokama qilinib, sayyohlar xavfsizligi masalasi yana ko‘tarildi.
Ma’lum bo‘lishicha, rossiyalik oila farzandi va do‘stlari bilan birga Shri-Lankadagi milliy bog‘lardan biriga sayohat qilayotgan edi. Yo‘lning bir qismida ular katta Shri-Lanka fili bilan to‘qnash kelgan.
Hayvon yo‘l o‘rtasida paydo bo‘lib, mashina harakatini to‘xtatib qo‘ygan. Mahalliy aholi so‘zlariga ko‘ra, fillar odatda sayyohlardan shirinlik yoki meva olish maqsadida mashinalarni to‘xtatadi.
Shirinlik olgach, ular mashinalarni o‘tkazib yuboradi. Rossiyalik ayollardan biri filga meva bergan, biroq hayvon kutilmaganda tajovuz qila boshlagan.
U mashinani silkitib, eshigini uzib tashlagan va hatto avtomobilni ag‘darishga uringan. Vahimaga tushgan sayyohlar mashinadan chiqib, xavfli joydan tezda uzoqlashishga harakat qilishgan.
Bir necha daqiqadan so‘ng fil tinchlangan va sayyohlar yo‘lni davom ettirish imkoniga ega bo‘lishgan. Hodisa oqibatida hech kim jarohat olmagan.
Qaytishda esa ular uzilgan eshikni o‘zlari bilan olib ketishgan. Bu voqea ularga unutilmas xotira bo‘lib qolgan.
