Alisher Usmonov Germaniyada sudda yana g‘alaba qozondi

Milliarder Alisher Usmonov Germaniyada yana bir muhim sud g‘alabasiga erishdi. Bu haqda Zamin.uz xabar berdi.

Gamburg yer sudi tadbirkorning da’vosini qanoatlantirib, Frankfurter Allgemeine Zeitung (FAZ) nashri tomonidan tarqatilgan ma’lumotlarni tuhmat deb topdi. Sud qaroriga ko‘ra, nashr Usmonovning Kreml bilan aloqalari va uning boyligi siyosiy maqsadlarda ishlatilishi haqidagi asossiz iddaolarni tarqatishni to‘xtatishi shart.

Ushbu qarorni buzgan taqdirda, nashr 250 ming yevrogacha jarima to‘lashi yoki mas’ullar ma’muriy javobgarlikka tortilishi mumkin. Gamburg sudi tomonidan e’lon qilingan hujjatda FAZ nashri Usmonov haqida bir qator noto‘g‘ri ma’lumotlarni tarqatgani qayd etilgan.

Jumladan, tadbirkorning mablag‘lari Rossiya hukumati manfaatlari yo‘lida ishlatilayotgani, uning O‘zbekistonda Rossiya hokimiyatini norasmiy ifoda etayotgani va «Kommersant’» nashri ishlariga aralashayotgani haqidagi da’volar asossiz deb topildi. Mazkur sud qarorining yana bir muhim jihati shundaki, Yevropa yurisdiksiyasida ilk bor Aleksey Navalniyning Usmonovga nisbatan aytgan bayonotlarini tarqatish taqiqlandi.

Ilgari Rossiya sudlari tomonidan yolg‘on deb topilgan bu iddaolar endi Yevropa sudlari tomonidan ham rad etildi. Alisher Usmonovning advokati Yoaxim Shtaynxyofelning ta’kidlashicha, bunday asossiz ma’lumotlar Yevropa Ittifoqi tomonidan tadbirkorga qarshi sanksiyalar qo‘llashda asos bo‘lgan.

Gamburg sudi qarori esa bu sanksiyalarning noqonuniy asoslanganini ko‘rsatadi. Bu Usmonovning G‘arb ommaviy axborot vositalariga qarshi birinchi g‘alabasi emas.

Avvalroq, u Dilbar superyaxtasi bo‘yicha tarqatilgan noto‘g‘ri ma’lumotlarni ham inkor ettirishga muvaffaq bo‘lgan edi. Shuningdek, Germaniyada tadbirkorga qarshi ochilgan pul yuvish va sanksiyalarni buzish bo‘yicha tergovlar ham to‘xtatilgan.

Forbes ma’lumotlariga ko‘ra, Usmonovning boyligi 2025 yil holatiga ko‘ra 16,7 milliard dollarni tashkil etadi. Hozirda Alisher Usmonov Yevropa Ittifoqi tomonidan qo‘yilgan cheklovlarga qarshi kurashni davom ettirmoqda.

Ushbu sud qarorlari uning sanksiyalar ro‘yxatidan chiqarilishiga olib kelishi mumkinmi? Bu savolga javobni vaqt ko‘rsatadi.