Buyuk Britaniyada sil kasalligi 25 foizga oshdi
Buyuk Britaniyada sil (tuberkulyoz) kasalligi bilan bog‘liq holat jiddiy tus olmoqda. Bu haqda Zamin.uz xabar berdi.
Daily Express nashrining Sog‘liqni saqlash xavfsizligi agentligi ma’lumotiga tayanib xabar berishicha, 2022 yildan boshlab silga chalinganlar soni 25 foizga oshgan. So‘nggi yillarda kasallik dinamikasi quyidagicha: - 2024 yilda 5 480 ta holat qayd etilgan (eng yuqori ko‘rsatkich); - 2025 yilda esa 5 424 ta holat ro‘yxatga olingan.
Mutaxassislarning ta’kidlashicha, ayniqsa Angliyaning shimoli-sharqiy hududlarida vaziyat ancha xavotirli. Surrey universitetining bakteriologiya bo‘yicha eksperti Syuzi Xingli-Uilsonning fikriga ko‘ra, kasallik ko‘payishining asosiy sababi — tashxis qo‘yish va davolash jarayonining kechikishidir.
Inson kasallik alomatlarini sezganidan boshlab tibbiy yordamga murojaat qilguniga qadar o‘tgan vaqt uzoqlashgani infeksiyaning keng tarqalishiga sabab bo‘lmoqda. Shuningdek, ekspertlar kasallikning avj olishini aholining turmush darajasi pasayishi bilan bog‘lashmoqda.
Jozef Rountri jamg‘armasi ma’lumotlariga ko‘ra, Buyuk Britaniyada qariyb 14,2 million kishi qashshoqlik chegarasidan past darajada yashamoqda. Past turmush darajasi va nochorlik esa sil kabi ijtimoiy kasalliklarning keng tarqalishiga zamin yaratadi.
Bu holatlar sog‘liqni saqlash tizimi va ijtimoiy muammolarga jiddiy e’tibor qaratish zarurligini yana bir bor eslatmoqda.
