Kaliforniyada tuman sabab 59 ta mashina to‘qnashdi
AQShning Kaliforniya shtatida 99-shosse yo‘lida quyuq tuman tufayli yirik yo‘l-transport hodisasi sodir bo‘ldi. Bu haqda Zamin.uz xabar berdi.
Ushbu voqea 31-yanvar kuni ertalab, soat 08:15 atrofida kuzatilgan. Mahalliy yo‘l patruli bergan ma’lumotlarga ko‘ra, dastlab yo‘lning har ikki yo‘nalishida alohida to‘qnashuvlar yuz bergan.
Ushbu to‘qnashuvlar zanjirli avariyaga sabab bo‘lib, jami 59 ta avtomobil ishtirok etgan hodisa yuzaga kelgan. Hodisa Tulare okrugi hududida, Beykersfild shahridan 40 mil shimolda sodir bo‘lgan.
Tuman shu darajada qalin bo‘lganki, ko‘rish masofasi atigi 45–60 metrni tashkil qilgan. Yo‘l harakati xavfsizligini ta’minlash uchun shosse bir necha soatga yopilgan va faqat tushdan keyin, soat 14:30 atrofida harakat qayta tiklangan.
Rasmiylarning ma’lum qilishicha, hodisa natijasida bir necha kishi yengil va o‘rtacha darajada jarohat olgan. Hozirda avariyaning aniq sabablari, jumladan, birinchi to‘qnashuvlarga nima sabab bo‘lgani yuzasidan tergov ishlari olib borilmoqda.
Mutaxassislar bunday katta avariyalar qish faslida tez-tez sodir bo‘lishini qayd etmoqda. Tuman, muzlama va yomg‘irli ob-havo sharoitlari ertalabki paytda yo‘ldagi xavfni bir necha barobarga oshiradi.
Shunga o‘xshash hodisalar avval Michigan shtatida ham kuzatilgan edi. Yo‘l patruli haydovchilarga xavfsizlik choralarini yana bir bor eslatmoqda: tezlikni pasaytirish, oldingi avtomobil bilan masofani saqlash va past ko‘rish sharoitida hushyor bo‘lish.
Tumanli ob-havo sharoitida shoshilish katta xavfga olib kelishi mumkin. Shu sabab haydovchilar ehtiyotkorlikni birinchi o‘ringa qo‘yishlari zarur.
