Trevi favvorasiga kirish endi pullik bo‘ldi
Italiya poytaxti Rim shahrida joylashgan mashhur Trevi favvorasiga kirish endi pullik bo‘ldi. Bu haqda Zamin.uz xabar berdi.
Ommaviy axborot vositalarining xabar berishicha, sayyohlar favvora hududiga yaqinlashib, unga tanga tashlash uchun to‘lov amalga oshirishlari kerak bo‘ladi. Rasmiy ma’lumotlarga ko‘ra, har kuni soat 09:00 dan 22:00 gacha favvora hududiga kirish ikki yevro evaziga amalga oshiriladi.
Biroq, besh yoshgacha bo‘lgan bolalar, nogironligi bor shaxslar va Rim shahrida yashovchi fuqarolar ushbu to‘lovdan ozod etiladi. Bundan tashqari, kechqurun va erta tongda favvoraga bepul kirish imkoni saqlanib qoladi.
Rim shahri ma’muriyatining hisob-kitoblariga ko‘ra, chipta sotuvlaridan yiliga 6,5 million yevrodan 20 million yevrogacha daromad kutilmoqda. Ushbu mablag‘lar favvorani saqlash, texnik xizmat ko‘rsatish va xodimlarning maoshlarini qoplashga yo‘naltiriladi.
Shuningdek, favvoraga tashlangan tangalarning avvalgidek Caritas di Roma xayriya tashkilotiga topshirilishi davom ettiriladi. Ushbu tashkilot kam ta’minlangan aholiga yordam ko‘rsatadi.
Ma’lumotlarga ko‘ra, har yili Trevi favvorasidan o‘rtacha 1,5 million yevro miqdorida tanga yig‘iladi.
