Tramp: Eron bilan muzokaralar ijobiy davom etmoqda
AQSh prezidenti Donald Tramp xalqaro maydondagi keskin vaziyatlar fonida Eron bilan olib borilayotgan muzokaralar yaxshi yo‘nalishda davom etayotganini ma’lum qildi. Bu haqda Zamin.uz xabar berdi.
U bu haqda Vashington shahrida o‘tkazilgan G‘azo bo‘yicha tinchlik tashabbuslariga bag‘ishlangan yig‘ilishda so‘z yuritdi. Tramp, ayniqsa, muzokaralar jarayonida faoliyat olib borayotgan maxsus vakil Stiv Uitkoff va diplomatik sa’y-harakatlarga jalb etilgan Jared Kushnerning ishini alohida e’tirof etdi.
Prezidentning so‘zlariga ko‘ra, amerikalik muzokarachilar so‘nggi kunlarda bir qator muhim va mazmunli uchrashuvlar o‘tkazgan. U Eron bilan olib borilayotgan muloqotlarda ijobiy o‘zgarishlar kuzatilayotganini ta’kidladi.
– Hozir Eron juda nozik va murakkab masala hisoblanadi. Shunga qaramay, vakillarimiz u yerda doimiy aloqa o‘rnatib, muzokaralarni samarali olib bormoqda.
Eng muhimi, muzokaralar ishchan va ijobiy ruhda davom etmoqda, – dedi Donald Tramp. Shu bilan birga, Tramp Eron bilan chuqur va mazmunli kelishuvlarga erishish oson emasligini qayd etdi.
U mintaqadagi siyosiy ziddiyatlar va beqarorlik muzokaralar jarayonini qiyinlashtirayotganini tan oldi. Biroq, prezidentning fikriga ko‘ra, tomonlar o‘rtasidagi muloqot uzilmagani va ishonchni tiklashga qaratilgan harakatlarning davom etayotgani muhim ahamiyatga ega.
Tramp AQSh ma’muriyati Eron bilan bog‘liq masalalarda diplomatik yechimlarga ustuvor ahamiyat berishini ta’kidladi.
