Tramp Xitoyga tashrif buyurib, savdo masalasini muhokama qiladi
AQSh prezidenti Donald Tramp Xitoyga rasmiy tashrif buyurishi kutilmoqda. Bu haqda Zamin.uz xabar berdi.
Reuters agentligining xabar berishicha, mazkur safar 31-martdan 2-aprelga qadar davom etishi rejalashtirilgan. Tashrif davomida Tramp Xitoy rahbari Si Szinpin bilan uchrashadi.
Bu ikki davlat yetakchilarining o‘tgan yil oktyabr oyidan buyon ilk marta yuzma-yuz uchrashuvi bo‘ladi. Uchrashuvda savdo kelishuvini uzaytirish masalasi muhokama qilinishi kutilmoqda.
Shuningdek, ikki tomon tariflar, soya va noyob resurslar eksporti, giyohvand moddalar ustidan nazorat kabi masalalarni ham kun tartibiga kiritgan. Bundan tashqari, Xitoy rahbari Si Szinpin AQShning Tayvanga qurol yetkazib berish rejalaridan xavotirda ekanini bildirgan.
Ushbu masala ham muzokaralarda ko‘tarilishi mumkin. Avvalroq Bloomberg agentligi AQSh Tayvanga ilgari kechiktirilgan ayrim qurol tizimlarini tezlashtirilgan tartibda yetkazib berishni rejalashtirayotgani haqida xabar bergan edi.
Mazkur masalalar ikki davlat o‘rtasidagi savdo va siyosiy munosabatlarda muhim ahamiyat kasb etishi kutilmoqda.
