Issiqko‘lda qizining homiladorligi sabab onasi joniga qasd qildi
Kecha Qirg‘izistonning Issiqko‘l viloyati, Oq-Suy tumanida 41 yoshli ayol qizi homilador bo‘lib qolganini og‘ir qabul qilib, o‘z joniga qasd qildi. Bu haqda Zamin.uz xabar berdi.
Ushbu voqea haqida mahalliy ichki ishlar organlari axborot berdi. Ma’lumotlarga ko‘ra, 25-fevral kuni tuman ichki ishlar bo‘limiga 2009 yilda tug‘ilgan qizning 16 haftalik homiladorligi haqida xabar kelib tushgan.
Holat bo‘yicha dastlabki tekshiruv olib borilgan va qiz so‘roqqa chaqirilgan. Onasi esa bu vaziyatni isnod deb baholab, tergov jarayonlarida ishtirok etishdan bosh tortgan.
O‘sha kunning kechki soat 21:00 atrofida ayol uyidan chiqib, o‘ziga benzin sepgan va o‘zini yoqib yuborgan. U og‘ir kuyish jarohatlari bilan shifoxonaga yetkazilgan, ammo shifokorlarning barcha urinishlariga qaramay, vafot etgan.
Hozirda mazkur voqea bo‘yicha sud-tibbiy ekspertiza tayinlangan. Shuningdek, holatning barcha jihatlarini aniqlash maqsadida tergov ishlari davom ettirilmoqda.
