Eronning yangi diniy rahbari urushda jarohatlanganligi haqida xabarlar tarqaldi
Eronning yangi diniy rahbari Mujtaba Xominaiy haqida tarqalgan so'nggi xabarlar Yaqin Sharqdagi siyosiy va axborot muhitiyanada qizg'inlashtirib yubordi. Bu haqda Zamin.uz xabar berdi.
Nyu-York Tayms gazetasining o'z manbalariga tayanib berishicha, urush boshlangan birinchi kuniyoq u oyog'idan yaralangan va shu sababli tanlanganidan beri ommaviy chiqishlar qilmaslikda davom etmoqda. Gazeta xabariga ko'ra, hukumatdagi yuqori lavozimli amaldorlar u haqiqatan ham jarohatlanganligini tasdiqlagan.
Hozirda u hushyor holatda ekan va xavfsizligi ta'minlangan maxsus joyda yashiringan. Bunday ko'rinmaslik holati bugungi kunning harbiy xavflarini hisobga olganda, rahbarning hayotini saqlab qolish maqsadida amalga oshirilayotgan tadbirlar bilan izohlanmoqda.
Isroil tomonidan ham shunga o'xshash fikrlar bildirilmoqda. Reuters agentligining ma'lumotlariga ko'ra, Isroil razvedka xizmati 28 fevral kuni boshlangan zarbalar natijasida Mujtaba Xominaiy yengil jarohat olgan deb baholamoqda.
Eronning o'z davlat tashkilotlari va rasmiy tabriknomalarida ham u haqida yarador urush faxriysi degan iboralar ishlatilgan. Bu so'zlar tasodifan tanlanmagan bo'lib, kuzatuvchilar buni jarohat haqidagi taxminlarni tasdiqlovchi dalil deb baholashmoqda.
Biroq, Eron ichida ham buni rad etuvchi ovozlar bor. Prezident Raisining o'g'li va davlat maslahatchisi sifatida tilga olinadigan shaxs 10 mart kuni Telegram orqali jarohat haqidagi xabarlarni eshitganini, lekin yaqin atrofdagilar bilan so'zlashganda uning sog'-salomat ekanligini aytilganini ma'lum qildi.
Bu mavzudagi bahslar birinchi marta bo'lmayapti. 7 mart kuni Isroil OAVlarida ham shunga o'xshash xabarlar e'lon qilingan edi.
Keyinchalik 8 mart kuni Eron rasmiy nashrlari yangi rahbarning aynan 56 yoshli Mujtaba Xominaiy ekanligini tasdiqladi. Hozirgi kunda vaziyat shundayki, xalqaro OAVlar va razvedka ma'lumotlari jarohat borligini ta'kidlayapti, Eron rasmiylari esa buni inkor etmoqda.
Eng katta savol esa yangi rahbar qachon ommaga chiqadi va o'zi gapirib, buni tasdiqlay yoki rad etadi. Hozirdagi bu sukut har xil mish-mishlarning paydo bo'lishiga sabab bo'lmoqda.
