Eron yangi oliy rahbari jarohat olganini tasdiqladi

Eron Tashqi ishlar vazirligi mamlakatning yangi tayinlangan Oliy rahbari Mujtabo Xomanaiy jarohat olganini rasman tasdiqladi. Bu haqda Zamin.uz xabar berdi.

Vazirlik matbuot kotibi Ismoil Baqoiy Italiyaning Corriere della Sera gazetasiga bergan intervyusida bu holatni tasdiqlab, rahbarning salomatligi jiddiy xavf ostida emasligini aytdi. Uning so'zlariga ko'ra, hozircha Oliy rahbar xalqqa murojaat qilish sanasi aniq belgilanmagan.

Baqoiy shu bilan birga Ekspertlar assambleyasi ushbu oliy lavozim uchun uch yoki to'rt nafar ehtimoliy nomzodlar ro'yxatini tayyorlagan va ular orasidan Mujtabo Xomanaini tanlaganini ta'kidladi. Avvalroq xalqaro ommaviy axborot vositalarida yangi rahbar 28 fevral kuni AQSh va Isroil qurollari tomonidan qilingan dastlabki zarbalar davomida yaralanganligi haqida xabarlar tarqalgan edi.

Ma'lumotlarga ko'ra, u oyog'idan jarohat olgan bo'lishi mumkin. Aynan shu sababli va qat'iy xavfsizlik protokollari tufayli so'nggi paytlarda u omma oldida ko'rinish bermasdan kelmoqda.

AQSh va Isroil tomonidan 28 fevral kuni boshlangan harbiy operatsiyalar Tehronning yadro quroliga ega bo'lishining oldini olish maqsadida amalga oshirilgan edi. Davom etayotgan mojaro natijasida kamida ming uch yuz kishi qurbon bo'ldi.

Qurbonlar orasida sobiq Oliy rahbar Ali Xomanaiy ham bor edi. Uning vafotidan so'ng, 9 mart kuni Ekspertlar assambleyasi uning o'g'li Mujtabo Xomanaini rasman yangi Oliy rahbar sifatida e'lon qildi.

Hozirda mamlakat boshqaruvi yangi rahbarning tuzalishi va rasmiy faoliyatini boshlashini kutmoqda.