Forbes reytingida birinchi o‘rinni Stiven Spilberg egalladi
Forbes jurnali dunyodagi eng boy mashhur shaxslar ro‘yxatini e’lon qildi. Bu haqda Zamin.uz xabar berdi.
Bu safar birinchi o‘rinni taniqli kinorejissyor Stiven Spilberg egalladi. Uning mol-mulki 7,1 milliard dollarga baholanmoqda.
Hozirgi kunda 79 yoshni qarshi olgan Spilberg jahon kino san’ati tarixidagi eng muvaffaqiyatli ustalaridan biri hisoblanadi. U Oq jag‘lar, Yura davri bog‘i va Indiana Jons kabi dunyoga mashhur bo‘lgan filmlar orqali katta daromad topgan.
Bundan tashqari, u DreamWorks kinostudiyasining asoschilaridan biri hamdir. Rejissyor ilk bor 1994 yilda Forbes reytingiga kiritilgan bo‘lib, shundan buyon o‘sha ro‘yxatni tark etmagan.
Reytingda ikkinchi pog‘onani yana bir mashhur kinorejissyor Yulduzlar jangi filmlari muallifi Jorj Lukas egalladi. 81 yoshli usta rejissyorning boyligi 5,2 milliard dollarga baholanmoqda.
Uchinchi o‘rinda esa basketbol afsonasi Maykl Jordan joylashgan bo‘lib, uning umumiy boyligi 4,3 milliard dollarni tashkil etadi. Forbes ro‘yxatida boshqa mashhur va boy shaxslar ham qayd etilgan.
Jumladan, beshinchi o‘rinni teleboshlovchi Opra Uinfri egallagan. Uning boyligi 3,2 milliard dollarni tashkil qiladi.
Yettinchi o‘rinda mashhur qo‘shiqchi Teylor Svift, o‘n birinchi o‘rinda esa golf bo‘yicha jahon yulduzi Tayger Vuds joylashgan. Ularning boyligi mos ravishda 2 milliard va 1,5 milliard dollarni tashkil etadi.
Shuningdek, basketbolchi Lebron Jeyms 1,4 milliard dollar bilan o‘n to‘rtinchi o‘rinda qayd etilgan. Aktyor va sobiq siyosatchi Arnold Shvarsenegger 1,2 milliard dollar bilan o‘n oltinchi pog‘onada turibdi.
Reytingning keyingi qatorlarida tennis yulduzi Rojer Federer va mashhur rejissyor Jeyms Kemeron ham bor. Ularning har birining boyligi 1,1 milliard dollarni tashkil qiladi.
Ro‘yxatning oxirgi qatorlarida esa musiqiy sahnaning taniqli vakillari qo‘shiqchilar Rihanna va Beyonse joylashgan. Ularning har birining boyligi 1 milliard dollarga baholangan.
Bu ro‘yxat san’atkorlar va sportchilarning faqat ijodiy mehnati emas, balki biznesdagi ham katta muvaffaqiyatini ko‘rsatib turibdi.
