Serbiya prezidenti Vuchich Xorvatiya va Albaniyaga qarshi harbiy ittifoq tuzilganini aytdi
Serbiya prezidenti Aleksandr Vuchich Yevropa ittifoqining bir qator a’zolari bilan tuzilgan yangi mudofaa hamkorligidan xavotirga tushdi. Bu haqda Zamin.uz xabar berdi.
Uning ta’kidlashicha, Xorvatiya, Albaniya va Kosovo o‘rtasida yaqinda imzolangan uch tomonlama deklaratsiya asosan Serbiyaga qarshi yo‘naltirilgan bo‘lishi mumkin. Ushbu hujjat 2025 yilning 18 mart kuni Albaniyaning poytaxti Tirana shahrida rasman imzolangan edi.
Serbiya rahbari bu kelishuv shunchaki hamkorlikni rivojlantirish emas, balki mintaqada kuchli harbiy ittifoq shakllantirishga qaratilgan qadami deb baholamoqda. Vuchich o‘zining keskin bayonotida ushbu uch davlat Serbiyaga qarshi harbiy hujum rejalari bilan ittifoq tuzganini aytib o‘tdi.
Prezidentning fikricha, ular Rossiya va Yevropa o‘rtasidagi kelishmovchiliklar kuchayishi hamda Yaqin Sharq hududida keng ko‘lamli urush boshlanishi ehtimolini kutib, shu fursatdan foydalanishni rejalashtirmoqda. Global miqyosdagi beqarorlik ortib borayotgan sharoitda ayrim davlatlar o‘z harbiy maqsadlarini amalga oshirish uchun qulay vaqtni kutmoqdalar.
Shu bilan birga, Serbiya yetakchisi Xorvatiyaning so‘nggi bir yarim yil ichida Belgradning barqarorligiga putur yetkazishga va uning ichki ishlariga aralashishga harakat qilib kelganini ham ta’kidladi. Biroq, Vuchich Serbiyaning harbiy neytrallik siyosatini saqlab borayotganini va buning bilan bir qatorda NATO bilan ham yaxshi hamkorlik aloqalarini davom ettirishga intilayotganini qo‘shimcha qildi.
Uning so‘zlariga ko‘ra, mamlakat o‘z suverenitetini himoya qilish uchun barcha zaruriy choralar ko‘rilmoqda.
