AQSH aksilterror rahbari Yaqin Sharq siyosati sabab iste’foda
AQSH Milliy aksilterror markazi rahbari Jo Kent lavozimidan iste’fo berishini e’lon qildi. Bu haqda Zamin.uz xabar berdi.
Uning aytishicha, bu qarorining asosi Yaqin Sharqda, xususan Eron bilan bog‘liq harbiy harakatlar bilan bog‘liq. Jo Kent Donald Tramp ma’muriyatida terrorizmga qarshi kurashni muvofiqlashtirish bo‘yicha ishlagan.
Uning nomzodi AQSH Senati tomonidan tasdiqlanib, 2024 yil iyulidan Milliy aksilterror markazi rahbari sifatida faoliyat boshlagan edi. Biroq u ijtimoiy tarmoqlarda prezidentga murojaat qilib, Erondagi urushni vijdonan qo‘llab-quvvatlay olmasligini bildirdi.
Kentning fikricha, Eron AQSH uchun bevosita tahdid emas. Amerika Eronga qarshi harakatlarni Isroil va uning AQSHdagi nufuzli lobbi bosimi ostida boshlagan.
Shu sababli u iste’foga chiqib, yangi avlodlarni urushlarda qurbon qilish siyosatini qo‘llab-quvvatlamaslikni ma’qul ko‘rdi. Shuningdek, uning shaxsiy hayoti ham bu qarorga ta’sir ko‘rsatgan.
Kentning rafiqasi Shennon Kent 2019 yilda Suriyada xudkush hujumida halok bo‘lgan. U, shuningdek, Isroilning yuqori martabali amaldorlari va nufuzli amerikalik jurnalistlar tomonidan tarqatilgan ma’lumotlarning Trampning “Amerika hamma narsadan ustun” siyosatiga zarar yetkazganini ham ta’kidladi.
Hozirgacha Donald Tramp bu iste’fo haqida rasman hech qanday fikr bildirmadi. Jo Kentning bu qadamlari AQSH siyosiy muhitida va jamoatchilik orasida katta e’tibor qozonmoqda.
