Zelenskiy Yaqin Sharqda ukrainalik harbiylar sonini oshirmoqda
Ukraina prezidenti Volodimir Zelenskiy 17 mart kuni Buyuk Britaniya parlamentida so‘zlagan nutqida hozirda Yaqin Sharq davlatlarida 201 nafar ukrainalik harbiy mutaxassis faoliyat yuritayotganini, yana 34 nafari esa joylashtirishga tayyor ekanini ma’lum qildi. Bu haqda Zamin.uz xabar berdi.
Zelenskiy ta’kidlashicha, bu mutaxassislar Rossiyaning Ukrainaga qarshi muntazam amalga oshirayotgan Shahed turidagi dron hujumlaridan himoya qilish bo‘yicha professional harbiylar hisoblanadi. Uning so‘zlariga ko‘ra, bu guruhlar Birlashgan Arab Amirliklari, Qatar va Saudiya Arabistonida faoliyat olib bormoqda, shuningdek Kuvaytga ham jo‘natilmoqda.
Bundan tashqari, boshqa davlatlar bilan ham hamkorlik aloqalari allaqachon boshlangan. Zelenskiy Eronning mintaqada tahdid solishini davom ettirishini istamasligini bildirdi.
Prezident ekspertlarni yuborish haqidagi qaror Ukrainaning xalqaro hamkorlari, jumladan Amerika Qo‘shma Shtatlarining so‘rovi asosida qabul qilinganini ta’kidladi. Shuningdek, Zelenskiy Yaqin Sharqdagi nizo fonida ittifoqchilar Ukrainani unutmasligi kerakligini qayd etdi va Rossiya bilan Eron rejimlari o‘rtasidagi hamkorlik yaratgan xavflar haqida ogohlantirdi.
Uning fikricha, Rossiya va Erondagi rejimlar nafrat asosida bir-biriga bog‘langan va qurol sohasida hamkorlik qilmoqda. Ukraina esa nafratga asoslangan rejimlarning g‘alaba qozonmasligini ko‘rsatishga intilmoqda.
Buyuk Britaniya Bosh vaziri Kir Starmer esa Erondagi urush Ukrainadagi nizoni e’tibordan chetlashtirishiga yo‘l qo‘ymasligini va’da qildi. Londonda o‘tgan muzokaralar natijasida Zelenskiy va Starmer xavfsizlik hamda mudofaa sohasida hamkorlikni mustahkamlashga qaratilgan deklaratsiyani imzoladi.
Ushbu deklaratsiyada davlatlar qo‘shma mudofaa sanoati va texnologiya ekotizimini rivojlantirish, ishlab chiqarish liniyalarini tashkil etish, ilmiy tadqiqot va innovatsiyalarni amalga oshirish, mudofaa mahsulotlari ta’minoti zanjirini integratsiya qilish hamda sanoat sherikliklarini mustahkamlash kabi yo‘nalishlarda faoliyat olib borishni maqsad qilgan. Buyuk Britaniya hukumati ta’kidlaganidek, bu hamkorlik Ukraina nafaqat o‘z hududini agressiyadan himoya qilayotgan davlat, balki xalqaro sheriklar xavfsizligi hamda Yevropaning umumiy mudofaasini mustahkamlashga hissa qo‘shayotganini isbotlaydi.
