Eron razvedka vaziri Isroil zarbasida halok bo‘ldi
Eron razvedka vaziri Ismoil Xatib Tehronda Isroil aviazarbasi natijasida halok bo‘ldi. Bu haqda Zamin.uz xabar berdi.
Xatib Eronning eng nufuzli rahbarlaridan biri bo‘lib, marhum diniy rahbar Ali Xominayning yaqin safdoshi edi. Bu haqda Isroil mudofaa vaziri Israel Katsga tayanib, Times of Israel xabarlari tarqatdi.
Katsning so‘zlariga ko‘ra, zarba 18 martga o‘tar kechasi amalga oshirilgan. U shunday dedi: “Eronga berilgan zarbalar intensivligi oshib bormoqda.
Shu kecha Eron razvedka vaziri Xatib o‘ldirildi”. Isroil mudofaa vaziri ta’kidlaganidek, u va mamlakat bosh vaziri Binyamin Netanyaxu Isroil mudofaa armiyasiga Eronning yuqori martabali arbobini qo‘shimcha tasdiqlarsiz yo‘q qilishga ruxsat bergan.
Hozircha Eron rasmiylari Xatibning o‘limi haqidagi xabarlarni tasdiqlamadi, biroq rad ham etmadi. Ismoil Xatib 2021 yilda Eron razvedkasi rahbarligiga tayinlangan edi.
O‘tgan hafta AQSh Davlat Departamenti Eronning yuqori martabali mulozimlari haqida ma’lumot uchun 10 million dollar mukofot e’lon qilgan. Bu ro‘yxatda Mujtaba Xominay, Ali Larijoniy va Ismoil Xatibning ismlari bor edi.
Eslatib o‘tamiz, 17 mart kuni Isroil aviazarbasi oqibatida Eron xavfsizlik kengashi kotibi Ali Larijoniy ham halok bo‘lgan. Larijoniy bilan birga uning o‘g‘li Murtazo va uning qo‘riqlash xizmati boshlig‘i o‘rinbosari Alirizo Beyat ham qurbon bo‘lgan.
Shu kuni Isroil harbiylari “Basij” qo‘mondoni Ghulomrizo Sulaymoniyni ham yo‘q qilgan. Ali Larijoniy Eronda Ali Xominaydan keyin halok bo‘lgan eng yuqori martabali mulozim sifatida tarixda qoladi.
The New York Times yozishicha, AQSh va Isroil hujumi boshlanishidan oldin mamlakatda amaldagi hokimiyat aynan Ali Larijoniyning qo‘lida bo‘lgan. Yanvar oyida Ali Xominay unga namoyishlarni bostirish va urushga tayyorgarlik ko‘rish topshirig‘ini bergan.
