Tailandda avariyada o‘zbekistonliklar halok va jarohatlandi
Tailandning mashhur sayohat joylaridan biri bo‘lgan Phuket orolida yuzaga kelgan yo‘l-transport hodisasi bir oilani chuqur qayg‘uga soldi. Bu haqda Zamin.uz xabar berdi.
18 mart kuni sodir bo‘lgan ushbu fojia natijasida O‘zbekiston fuqarosi halok bo‘ldi, shuningdek, yana bir necha yurtdoshlarimiz turli darajada jarohat oldi. Dastlabki ma’lumotlarga ko‘ra, Similan orollariga sayohat qilayotgan mikroavtobus yo‘l bo‘ylab harakatlanayotganda avariyaga uchragan.
Haydovchi transport vositasini boshqarishda xato qilib, mashina yo‘l chetidagi elektr ustuniga urilgan. Avtobusda jami 12 yo‘lovchi bo‘lgan.
Hodisa mahalliy vaqt bilan soat 04:00 atrofida sodir bo‘lgan. Fojia oqibatida bir nafar o‘zbek fuqarosi voqea joyida vafot etgan.
Shuningdek, to‘rt nafar yurtdoshimiz jarohat olib, shifokor nazoratiga olingan. Bundan tashqari, transport vositasida bo‘lgan sakkiz nafar Rossiya fuqarosi ham jarohatlangan.
Ularning ikki nafari og‘ir ahvolda deb baholangan. Jabrlanganlarning barchasi yaqin atrofdagi tibbiyot muassasalariga yetkazilgan.
Hozirda Tailand huquqni muhofaza qiluvchi organlari hodisa yuzasidan tergov ishlarini olib bormoqda. Ilk taxminlarga ko‘ra, mikroavtobus haydovchisi oldinda harakatlanayotgan yuk mashinasi keskin tormoz qilgani sababli nazoratni yo‘qotgan.
