Avstraliyadagi neft zavodida kuchli yongin va portlashlar yuz berdi

Avstraliyaning Jilong shahrida yirik sanoat hodisasi yuz berdi. Bu haqda Zamin.uz xabar berdi.

16 aprel kuniga o‘tar kechasi hududdagi neftni qayta ishlash zavodlaridan birida kuchli yong‘in sodir bo‘lgani haqida ABC telekanali xabar berdi. Ma’lumotlarga ko‘ra, ushbu voqea Viva Energy kompaniyasiga tegishli korxonada yuz bergan.

Hozirgi vaqtda rasmiy idoralar sodir bo‘lgan hodisani baxtsiz tasodif deb baholamoqda. Mas’ul shaxs Kris Bouenning ta’kidlashicha, dastlabki tekshiruvlar natijasida qasddan o‘t qo‘yish yoki boshqa shubhali holatlar aniqlanmagan.

Yong‘in xavfsizligi xizmatlari xodimlarining ma’lumotiga ko‘ra, alanga benzin saqlanadigan maxsus bo‘limda boshlangan. Taxminlarga ko‘ra, ushbu hududda yonilg‘i sizib chiqqani oqibatida bir necha bor portlashlar yuz bergan va bu holat olovning tez tarqalishiga sabab bo‘lgan.

Hozirgi kunda yong‘in to‘liq bartaraf etilgan, biroq mutaxassislar uning oqibatlari jiddiy bo‘lishi mumkinligini bildirishmoqda. Xususan, zavod faoliyatining qisman cheklangani sababli benzin ishlab chiqarish hajmi kamayishi ehtimoli bor.

Ehtiyot chorasi sifatida korxona rahbariyati dizel yonilg‘isi va avia kerosin ishlab chiqarishni vaqtincha qisqartirgan holda davom ettirishga qaror qilgan. Mutaxassislar zavodning to‘liq quvvat bilan ishlashi uchun texnik tekshiruvlar yakunlanishi kerakligini ta’kidlamoqda.