Donald Tramp onta urushni tugatganini va tinchlikni e'lon qildi

Amerika Qo'shma Shtatlari prezidenti Donald Tramp o'zining navbatdagi nutqida xalqaro munosabatlar va global xavfsizlik masalalariga oid muhim bayonotlar bildirdi. Bu haqda Zamin.uz xabar berdi.

Uning ta'kidlashicha, amalga oshirilgan siyosiy choralar natijasida sakkizta qurolli to'qnashuv yakunlangan. Agar Eron va Livandagi vaziyatlar ham hisobga olinsa, bu ko'rsatkich o'nta urushni tugatish bilan teng ekanini qayd etdi.

Prezident Hormuz bo'g'ozining tijorat kemalari uchun to'liq ochilganini butun dunyo uchun ijobiy signal deb baholadi. U ushbu voqeani tarixiy va yorug' kun deb atab, hududda tinchlik o'rnatilayotganidan mamnunligini bildirdi.

Shu bilan birga, Eronning yadro dasturi masalasida qat'iy pozitsiyada ekanini ta'kidlab, uran resurslari nazorati AQSH qo'lida bo'lishi kerakligini aytdi. Xalqaro xavfsizlik tizimiga to'xtalgan Donald Tramp NATO faoliyatini tanqid qildi.

Uning fikricha, ushbu tuzilma zarur paytlarda kutilgan foydani bermagan. Bu bayonot prezidentning xalqaro ittifoqlarga nisbatan shubhalari borligini yana bir bor namoyon etdi.

Livan kelajagi haqida gapirgan Tramp, ushbu mamlakatni qayta tiklash va uni yanada rivojlantirish niyatidaliğini bildirdi. Shuningdek, u Pokiston rahbariyatiga minnatdorchilik izhor etib, ushbu davlatni ishonchli hamkor sifatida ta'rifladi.

Nutq yakunida Amerika Qo'shma Shtatlarining dunyodagi nufuzi oshganini ta'kidlagan prezident, mamlakatning tanazzulga yuz tutgani haqidagi gaplar asossiz ekanini aytdi. Uning fikriga ko'ra, bugungi kunda Amerikaning qudrati va global ta'siri yanada mustahkamlandi.