Rossiyada portlash oqibatida O'zbekiston fuqarosi vafot etdi
Rossiyaning Vladikavkaz shahrida yuz bergan fojia oqibatida O'zbekiston fuqarosi vafot etdi. Bu haqda Zamin.uz xabar berdi.
Mazkur hodisa chiqindi yuklash jarayonida sodir bo'lgan kuchli portlash natijasida yuzaga kelgan. Voqea 17 aprel kuni shahar markazidagi Internatsionalnaya ko'chasi va Partizanskiy tor ko'chasining kesishgan qismida yuz berdi.
Portlash vaqtida ish joyida bo'lgan 46 yoshli erkak og'ir jarohat olib, voqea joyidayo hayotdan ko'z yumgan. Marhumning hamkasblari uning orqasida oilasi va besh nafar farzandi qolganini ma'lum qilishdi.
Hozirgi vaqtda hodisa sodir bo'lgan hududda tezkor xizmatlar va huquq-tartibot organlari faoliyat yuritmoqda. Voqeaning aniq sabablari va tafsilotlari chuqur o'rganilmoqda.
Rossiya tergov qo'mitasi tomonidan ehtiyotsizlik oqibatida inson o'limiga sabab bo'lish moddasi asosida jinoyat ishi qo'zg'atildi. Dastlabki taxminlarga ko'ra, portlash chiqindi ichida bo'lgan xavfli yoki portlovchi buyumlar tufayli yuzaga kelgan bo'lishi mumkin.
Maxsus xizmatlar chiqindi tashuvchi texnikani tekshirib, uni keyinchalik maxsus poligonga olib chiqishni rejalashtirmoqda. Shimoliy Osetiya Alaniya Respublikasi rahbari Sergey Menyaylo aholini ogohlantirdi.
U fuqarolarni xavfli buyumlarni oddiy chiqindi konteynerlariga tashlamaslikka va bunday narsalarni faqat maxsus xizmatlar orqali topshirishga chaqirdi. Bu chora kelgusida shunga o'xshash fojialarning oldini olish maqsadida amalga oshirilmoqda.
