Istanbulda ziyoratchilarni O‘zbekistonga jalb etuvchi yangi loyiha taqdim etildi
Turkiyaning Istanbul shahrida o‘tgan tadbirda Umra plyus O‘zbekiston loyihasi rasman taqdim etildi. Bu haqda Zamin.uz xabar berdi.
Mazkur tadbir O‘zbekiston Turizm qo‘mitasi, Turk davlatlari tashkiloti hamda Turkiyaning sayyohlik agentliklari birlashmasi hamkorligida tashkil etildi. Taqdimotda Turkiyaning ellikdan ortiq nufuzli turistik agentliklari vakillari ishtirok etishdi.
Loyihaning asosiy maqsadi umra ibodatini bajarish uchun Saudiya Arabistoniga kelgan ziyoratchilarni O‘zbekistonning muqaddas qadamjollari, boy tarixiy obidalari va zamonaviy infratuzilmasi bilan tanishtirishdan iborat. Shu tariqa, ziyoratchilar uchun yangi va qiziqarli sayyohlik yo‘nalishlari yaratiladi.
Tadbir davomida ishtirokchilarga Prezident Shavkat Mirziyoyev tashabbusi bilan barpo etilgan Islom sivilizatsiyasi markazi va Imom Buxoriy majmuasi haqida maxsus video materiallar namoyish etildi. Ushbu muassasalar O‘zbekistonning ilmiy va ma’rifiy merosini dunyoga namoyon etuvchi muhim markazlar sifatida taqdim etildi.
Tadbir yakunida Turkiya bozoridan O‘zbekistonga ziyoratchilar oqimini oshirish va yangi turistik yo‘nalishlarni samarali ishga tushirish bo‘yicha memorandum imzolandi. Imzolangan hujjatga ko‘ra, joriy yil yakuniga qadar mamlakatga tashrif buyuruvchi turistlar sonini sezilarli darajada ko‘paytirish ko‘zda tutilgan.
Bu chora ikki davlat o‘rtasidagi turizm sohasidagi aloqalarni yanada mustahkamlashga xizmat qiladi.
