AQSh Kongressi olimlarning shubhali o‘limi yuzasidan surishtiruv boshladi
Amerika Qo‘shma Shtatlarida yuqori malakali o‘n bir nafar mutaxassisning shubhali tarzda vafot etishi va izsiz g‘oyib bo‘lishi bilan bog‘liq voqealar dunyo jamoatchiligi e’tiborini tortmoqda. Bu haqda Zamin.uz xabar berdi.
Mazkur holat yuzasidan xalqaro nashrlar turli ma’lumotlarni tarqatmoqda. Vaziyatning jiddiyligi sababli AQSh Kongressi maxsus surishtiruv ishlarini boshladi.
Kongress a’zolari Jeyms Komer va Erik Burlison mamlakat Energetika vazirligi, Pentagon, Federal qidiruv bürosi hamda NASA kabi nufuzli tashkilotlarga rasmiy so‘rovnomalar yubordi. Qonun chiqaruvchilar o‘ta maxfiy ilmiy izlanishlar bilan shug‘ullangan xodimlarning taqdiri va ularning o‘limi tafsilotlarini to‘liq ochiqlashni talab qilmoqda.
Shuningdek, davlat sirlari bilan ishlaydigan shaxslar uchun xavfsizlik choralarini kuchaytirish va maxsus yo‘riqnomalar ishlab chiqish masalasi ham kun tartibiga qo‘yilgan. Kongress a’zosi Tim Berchettning fikricha, yuqori lavozimli mutaxassislar va ilm-fan namoyandalarining ketma-ket vafot etishi oddiy tasodif bo‘lishi mumkin emas.
Uning ta’kidlashicha, davlat idoralari ixtiyoridagi noma’lum uchar jismlar haqidagi ma’lumotlar oshkor etilsa, bu xalqni hayratga solishi tayin. AQSh rahbari Donald Tramp mazkur voqealarning asl sabablarini shaxsan o‘rganishga va’da bergan.
Oq uy ma’muriyati barcha dalillarni tekshirish uchun huquq-tartibot idoralari bilan yaqin hamkorlik qilmoqda. Ma’lumotlarga ko‘ra, 2022-yildan buyon yadro fizikasi va koinot tadqiqotlari sohasida faoliyat yuritgan o‘n birdan ortiq mutaxassis qurbon bo‘lgan yoki bedarak yo‘qolgan.
Ular orasida eng mashhur ismlardan biri AQSh Harbiy-havo kuchlari generali Uilyam Makkaslenddir. O‘ta maxfiy ma’lumotlarga ega bo‘lgan ushbu shaxsning qayerda ekanligi uzoq vaqtdan beri noma’lum bo‘lib qolmoqda.
Shuningdek, NASA xodimi Monika Hasinto Reza, soha pudratchisi Stiven Garsiya, astrofizik Karla Grillmayer va o‘z xonadonida otib o‘ldirilgan fizik Nunu Lureyru kabi shaxslarning taqdiri ham shubha ostida. Alohida e’tiborga molik holatlardan biri antigravitatsiya bo‘yicha tadqiqotlar olib borgan yosh olima Emi Eskridgening vafotidir.
Garchi uning o‘limi rasman o‘z joniga qasd qilish deb baholangan bo‘lsa-da, voqea tafsilotlari hukumat doiralarida jiddiy shubhalarni uyg‘otgan. Mutaxassislarning fikricha, bu hodisalar ortida dushman davlatlarning maxsus operatsiyalari turgan bo‘lishi ehtimoli ham ko‘rib chiqilmoqda.
Hozirda barcha holatlar yuzasidan chuqur tekshiruv ishlari davom etmoqda.
