O'zbekistonning Seuldagi elchixonasi Nozima Kim o'limi yuzasidan bayonot berdi

Janubiy Koreyada vafot etgan O'zbekiston fuqarosi Nozima Kimning o'limi bilan bog'liq ijtimoiy tarmoqlarda tarqalayotgan turli asossiz xabarlar ortidan mamlakatimizning Seul shahridagi elchixonasi rasmiy bayonot berdi. Bu haqda Zamin.uz xabar berdi.

Ayni paytda mazkur holat Janubiy Koreya huquq-tartibot idoralari tomonidan qat'iy nazorat ostida o'rganilmoqda. Elchixonaning ma'lum qilishicha, fojia yuz bergan ilk kunlardanoq mahalliy politsiya bilan yaqin aloqa o'rnatilgan bo'lib, tergov jarayonining har tomonlama xolis va shaffof o'tkazilishi uchun zarur choralar ko'rilmoqda.

Mazkur ish doirasida marhumaning onasi Feruza Alimbekova Janubiy Koreyaga taklif etildi. U yerda jabrlanuvchi tomon vakili sifatida bir qator rasmiy uchrashuvlarda ishtirok etdi.

Xususan, Pyontek shahri politsiya mahkamasida advokatlar va diplomatik korpus vakillari ishtirokida maxsus muloqot tashkil etildi. Ushbu uchrashuvda tergovning dastlabki xulosalari va amalga oshirilgan qo'shimcha tekshiruvlar natijalari haqida batafsil ma'lumot berildi.

Koreya tomoni taqdim etgan rasmiy hujjatlarga ko'ra, vafot etgan fuqaroning tanasida qotillik alomatlari aniqlanmagan. Sud-tibbiy ekspertizasi va chuqur tahlillarga tayanib, o'lim holati ehtimoliy o'z joniga qasd qilish sifatida baholangan.

Tekshiruvlar davomida olingan qon namunalari, barmoq izlari va DNK tahlillari marhumaning vujudida zaharlanish yoki tashqi tomondan bo'lgan kuchli jismoniy tazyiq izlari yo'qligini ko'rsatgan. Shuningdek, voqea joyidagi videokuzatuv kameralari va tibbiy muassasalardagi tasvirlar marhumaning yaqinlariga to'liq namoyish etilgan.

Politsiya vakillari ijtimoiy tarmoqlarda tarqalgan ayrim fotosuratlar rasmiy tergov hujjatlariga aloqador emasligini alohida ta'kidlab o'tdi. Bunday noto'g'ri ma'lumotlarni tarqatish qonuniy javobgarlikka sabab bo'lishi haqida ogohlantirish berildi.

Hozirda tergov ishlari yakuniga yetmagan bo'lib, O'zbekiston elchixonasi vaziyatni muntazam kuzatib bormoqda. Mutasaddi idoralar fuqarolardan faqat rasmiy manbalarga tayanishni va tasdiqlanmagan xabarlarga ishonmaslikni so'rab qoladi.