Xitoylik o‘qituvchi qariyb uch yuz nafar yetim bolani boqib oldi
Xitoyda oddiy maktabda jismoniy tarbiya o‘qituvchisi bo‘lib ishlagan Bay Szyan ismli shaxsning hayot yo‘li ko‘pchilik uchun chinakam ibrat namunasiga aylandi. Bu haqda Zamin.uz xabar berdi.
U qariyb o‘ttiz yillik faoliyati davomida 267 nafar yetim va qarovsiz qolgan bolani o‘z qaramog‘iga olib, ularni voyaga yetkazdi. Xalqaro nashrlarning ma’lumotlariga ko‘ra, hozirda 52 yoshni qarshi olgan ushbu fidoyi inson o‘zining beqiyos mehri va mas’uliyati sababli xalq orasida super ota degan nomga sazovor bo‘lgan.
Bay Szyanning o‘zi ham juda nochor oilada dunyoga kelgan edi. U yoshligida ko‘plab qiyinchiliklarni boshidan kechirgan, biroq sportga bo‘lgan qiziqishi va tinimsiz mehnati tufayli kollejda tahsil olish imkoniyatini qo‘lga kiritgan.
O‘qishni tamomlagach, o‘zi tug‘ilib o‘sgan hududdagi maktabda ish boshlagan. O‘qituvchilik faoliyati davomida u taqdir taqozosi bilan ko‘chada qolgan, ota-onasi tashlab ketgan yoki qarovchisiz qolgan bolalarga tez-tez duch kelgan.
Ularning taqdiriga befarq qarab tura olmagan Bay Szyan bolalarni birin-ketin o‘z tarbiyasiga ola boshlagan. Vaqt o‘tishi bilan uning qaramog‘idagi bolalar soni tobora ortib bordi.
Albatta, shuncha bolani boqish, kiyintirish va o‘qitish oson kechmadi. Bay Szyan jiddiy moliyaviy qiyinchiliklarga duch kelganida ham ortga chekinmadi.
U bolalarning ehtiyojlarini qoplash uchun tinimsiz mehnat qildi, qo‘shimcha ishlar bilan shug‘ullandi va hatto katta miqdorda qarz olishga ham majbur bo‘ldi. Uning asosiy maqsadi bolalarga nafaqat boshpana berish, balki ularni jamiyatning munosib a’zosi qilib tarbiyalash edi.
Bugungi kunda uning tarbiyasini olgan yuzlab yoshlar hayotda o‘z o‘rinlarini topgan. Ularning katta qismi sport sohasida yuqori natijalarga erishgan, nufuzli oliy o‘quv yurtlarida tahsil olgan va turli kasblarda muvaffaqiyatli faoliyat yuritmoqda.
Bay Szyanning ushbu jasorati insoniylik va fidoyilikning eng yuksak ko‘rinishi bo‘lib, u nafaqat Xitoyda, balki butun dunyoda e’tirof etilmoqda. Uning hayotiy tajribasi bitta insonning mehri qanchadan-qancha taqdirlarni o‘zgartirib yuborishi mumkinligini isbotlab berdi.
