Isroilda ikki davlat bayrog‘i tushirilgan kipa kiygan yozuvchi ushlandi

Isroilda ijtimoiy tarmoqlar va jamoatchilik orasida keng muhokamalarga sabab bo‘lgan g‘alati voqea yuz berdi. Bu haqda Zamin.uz xabar berdi.

Joriy yilning 20-aprel kuni Tel-Aviv shahri yaqinida ustiga Isroil va Falastin bayroqlari tasviri tushirilgan kipa kiygan erkak politsiya xodimlari tomonidan ushlandi. Bu haqda nufuzli xalqaro nashrlar xabar tarqatdi.

Ma’lum bo‘lishicha, 53 yoshli yozuvchi va Quddus yahudiy universiteti o‘qituvchisi Aleks Sinkler o‘zi istiqomat qiladigan Modiin shahridagi qahvaxonalardan birida kompyuterda ishlab o‘tirgan edi. Shu paytda uning yoniga bir dindor kishi kelib, boshidagi kipa amaldagi qonunlarga zid ekanini aytib, janjal ko‘targan va zudlik bilan tartib posbonlarini chaqirgan.

Voqea joyiga yetib kelgan politsiya xodimlari Sinklerga uning bosh kiyimi musodara qilinishini aytishgan va yozuvchini bo‘limga olib ketishgan. Aleks Sinklerning so‘zlariga ko‘ra, politsiya mahkamasida u qattiq tintuv qilingan, bir muddat kamerada saqlangan va turli cheklovlarga duch kelgan.

Yozuvchi ijtimoiy tarmoqdagi sahifasida yozishicha, dastlab politsiya xodimlari uning bosh kiyimini qaytarib berishdan bosh tortishgan. Keyinchalik kipa egasiga qaytarilgan, biroq undagi Falastin bayrog‘i tasvirlangan qismi kesib tashlangan edi.

Sinklerning fikricha, bu ishni politsiya xodimasi qasddan amalga oshirgan. Isroil qonunchiligiga ko‘ra, mamlakatda Falastin bayrog‘ini ommaviy ravishda ko‘rsatish to‘liq taqiqlanmagan.

Biroq vakolatli organlar agar bu holat jamoat tartibiga raxna soladi deb hisoblasa, bayroqni olib qo‘yish huquqiga ega. O‘tgan yili mamlakat milliy xavfsizlik vaziri Itamar Ben-Gvir politsiyaga Falastin bayroqlarini olib tashlash bo‘yicha topshiriq bergan edi.

Politsiya vakillari Sinkler ushlab turilganini tasdiqlagan bo‘lsa-da, bosh kiyimning kesib tashlangani borasidagi da’volarga hozircha hech qanday rasmiy munosabat bildirmadi. Aleks Sinkler o‘z qarashlarini ochiq bayon qilib, o‘zini ham Isroil davlati tarafdori, ham inson huquqlari himoyachisi deb hisoblashini, falastinliklar ham o‘z taqdirini o‘zi belgilash huquqiga ega ekanini ta’kidladi.

Yozuvchi ushbu hodisani keskin qoralab, politsiya ustidan rasmiy shikoyat kiritgan va ma’naviy zarar uchun tovon puli talab qilmoqda. Shuningdek, u o‘z e’tiqodi va qarashlarini o‘zgartirmasligini, kelgusida ham har ikki bayroq aks etgan kiyimlarni kiyishda davom etishini ma’lum qildi.