Rossiyalik boylar Yangi Zelandiyadan bunkerli uylar sotib olmoqda
Ommaviy axborot vositalarining xabarlariga ko‘ra, Rossiyaning boy tabaqalari vakillari dunyodagi ehtimoliy yirik to‘qnashuvlar va Uchinchi jahon urushi xavfi ortib borayotganidan xavotirga tushmoqda. Bu haqda Zamin.uz xabar berdi.
Shu sababli, ular xavfsiz hudud sifatida Yangi Zelandiyaga katta qiziqish bildira boshladilar. Ayniqsa, maxsus yer osti boshpanalari yoki bunkerlar bilan jihozlangan uy-joylarga bo‘lgan talab keskin oshgani kuzatilmoqda.
Mutaxassislarning ma’lum qilishicha, so‘nggi vaqtlarda “tinchlik oroli” sifatida ko‘rilayotgan ushbu davlatda ko‘chmas mulk sotib olish istagida bo‘lganlar soni deyarli uch baravarga ko‘paygan. Eng ko‘p talab Oklend, Vellington va Kraystcherch kabi yirik shaharlardagi uylarga qaratilmoqda.
Talabning ortishi natijasida mazkur hududlarda uy-joy narxlari ham sezilarli darajada qimmatlashgan. Hozirda ko‘chmas mulk qiymati o‘rtacha 300 ming dollardan boshlanib, 2,5 million dollargacha yetmoqda.
Ayrim hollarda esa tashqi dunyodan mustaqil ravishda energiya va suv bilan ta’minlangan, mustahkam himoya tizimiga ega hovlilar eng xaridorgir ob’ektlarga aylangan. Kuzatuvchilarning fikricha, bu holat jahondagi geosiyosiy beqarorlik va xalqaro maydondagi keskinliklar bilan bevosita bog‘liqdir.
Kelajakka nisbatan noaniqliklar kuchayishi fonida moliyaviy imkoniyati yuqori bo‘lgan shaxslar o‘zlari va yaqinlari uchun xavfsiz panohgoh tayyorlashga urinmoqdalar. Ular ehtimoliy global inqirozlar vaqtida uzoq va tinch orollarda jon saqlashni afzal ko‘rishmoqda.
Tahlilchilar bunday tendensiya faqatgina Yangi Zelandiya bilan cheklanib qolmasligini ta’kidlamoqda. Dunyo miqyosida xavfsiz deb hisoblangan boshqa hududlarda ham ko‘chmas mulk bozoriga talab oshishi va bu o‘z navbatida narxlarning yanada ko‘tarilishiga sabab bo‘lishi mumkin.
Hozirgi kunda boy qatlam vakillari uchun nafaqat hashamat, balki xavfsizlik va barqarorlik asosiy ustuvor vazifaga aylangan.
