Turkiyada o‘smirlarning ijtimoiy tarmoqlardan foydalanishiga taqiq qo‘yildi
Turkiya hukumati bolalar va o‘smirlarning internet makonidagi xavfsizligini ta’minlash maqsadida muhim qonun hujjatini qabul qildi. Bu haqda Zamin.uz xabar berdi.
Yangi tartibga ko‘ra, endilikda 15 yoshga to‘lmagan foydalanuvchilarning ijtimoiy tarmoqlardan foydalanishi rasman taqiqlanadi. Xalqaro axborot agentliklarining xabar berishicha, ushbu chora yosh avlodni onlayn muhitdagi turli xavf-xatarlardan himoya qilishga qaratilgan.
Mazkur qonun talablariga muvofiq, barcha onlayn platformalar o‘z foydalanuvchilarining yoshini aniqlash va tekshirish bo‘yicha qat’iy mexanizmlarni joriy etishi shart etib belgilandi. Bu degani, endi yoshni yashirish yoki sohta ma’lumotlar yordamida ro‘yxatdan o‘tish imkoniyati sezilarli darajada cheklanadi.
Mazkur choralar bolalarni ularning ruhiyatiga salbiy ta’sir ko‘rsatuvchi zararli axborotlardan saqlashda muhim ahamiyat kasb etadi. Yangi qoidalar faqat ijtimoiy tarmoqlar bilan cheklanib qolmay, o‘yin platformalariga ham tatbiq etiladi.
O‘yin ishlab chiqaruvchilar o‘z mahsulotlarini yosh toifalariga qarab tasniflashi va foydalanuvchilarni tegishli cheklovlar asosida qabul qilishi shart bo‘ladi. Bu orqali voyaga yetmaganlarning yoshiga mos kelmaydigan kontentga duch kelishining oldi olinadi.
Shuningdek, qonunda foydalanuvchilar soni ko‘p bo‘lgan yirik texnologik kompaniyalar uchun Turkiya hududida rasmiy vakolatxona ochish majburiyati yuklangan. Bu talab davlat organlariga qonunbuzarlik holatlariga nisbatan tezkor choralar ko‘rish va nazoratni kuchaytirish imkonini beradi.
Mamlakatda yuz bergan ayrim noxush voqealardan so‘ng, hukumat qo‘shimcha xavfsizlik choralarini ham ko‘rib chiqmoqda. Xususan, bolalar uchun zararli saytlarni avtomatik ravishda to‘suvchi maxsus filtrli aloqa kartalarini joriy etish rejalashtirilgan.
Mutasaddilar nafaqat ijtimoiy tarmoqlar, balki VPN xizmatlarini cheklash va 18 yoshgacha bo‘lgan yoshlar uchun internetdan foydalanish tartibini yanada qattiqlashtirish masalasini ham muhokama qilmoqda. Turkiyada amalga oshirilayotgan ushbu islohotlar raqamli xavfsizlikni ta’minlash borasidagi qat’iy qadam bo‘lib, kelgusida boshqa mamlakatlar uchun ham o‘ziga xos tajriba vazifasini o‘tashi mumkin.
