Rossiya armiyasida oziq-ovqat yetishmovchiligi sababli odamxo‘rlik holatlari aniqlandi
Rossiya qurolli kuchlari saflarida oziq-ovqat ta’minoti bilan bog‘liq jiddiy muammolar yuzaga kelgani haqida xabarlar tarqalmoqda. Bu haqda Zamin.uz xabar berdi.
Britaniyaning nufuzli nashrlaridan biri bo‘lgan The Sunday Times gazetasining yozishicha, Ukrainadagi jangovar harakatlarda ishtirok etayotgan ayrim rossiyalik harbiylar orasida o‘z hamkasblarining go‘shtini iste’mol qilish, ya’ni odamxo‘rlik holatlari qayd etilgan. Ushbu ma’lumotlar Ukraina harbiy razvedkasi tomonidan taqdim etilgan dalillarga, jumladan, o‘ndan ortiq audioyozuvlar va fotosuratlarga asoslangan.
Hujjatlarda kamida beshta shunday mudhish voqea haqida so‘z boradi. Xabarlarga ko‘ra, shunday voqealardan biri o‘tgan yilning noyabr oyida Donetsk viloyatining Mirnograd yo‘nalishida sodir bo‘lgan.
Ma’lumotlarda keltirilishicha, motorli miltiq brigadasida xizmat qilgan askarlardan biri ikki nafar safdoshini o‘ldirib, ularning tana qismlarini iste’mol qilishga uringan. Mazkur holat haqida harbiy bo‘linma qo‘mondonligiga Telegram messenjeri orqali maxsus xabar va dalil tariqasida fotosuratlar yuborilgan.
Mutaxassislar va harbiy jarrohlar ushbu tasvirlarni o‘rganib chiqib, tana qismlari jangovar to‘qnashuvda emas, balki o‘tkir asbob yordamida qasddan kesilgani haqida xulosa berishgan. Audioyozuvlarda ofitserlar o‘z qo‘l ostidagi askarlarning ruhiy holati yomonlashgani, ular qattiq ochlik va charchoqdan aziyat chekayotganini bildirgan.
Masalan, qo‘lga olingan askarlardan biri inson go‘shtini yeyishga harakat qilayotgan paytda podvalda topilgan va qarshilik ko‘rsatgani sababli o‘sha yerning o‘zida yo‘q qilingan. Shuningdek, boshqa harbiy bo‘linmalarda ham qo‘mondonlar o‘z buyruqlari bilan askarlarga odam go‘shtini iste’mol qilishni qat’iyan taqiqlashga majbur bo‘lgani aytilmoqda.
Bunday buyruqlar odatda spirtli ichimliklar va giyohvand moddalarni taqiqlash bilan bir qatorda e’lon qilingan. G‘arbiy harbiy ekspertlar va sobiq yuqori martabali harbiylarning fikricha, Rossiya armiyasida ta’minot tizimi juda yomon ahvolda.
Qo‘shinlarni zaruriy oziq-ovqat va ashyolar bilan ta’minlash masalasi qo‘mondonlik uchun birlamchi vazifa hisoblanmaydi. Bu esa askarlar orasida intizomning butunlay yo‘qolishiga va insoniyatga xos bo‘lmagan vahshiyona harakatlarning ko‘payishiga olib kelmoqda.
Ukraina tomoni ham asirga tushgan askarlar oylar davomida normal ovqat yemasdan, faqat quruq ozuqalar bilan kun kechirganini bir necha bor ta’kidlagan.
