Tuapseda neftni qayta ishlash zavodi dronlar hujumiga uchradi
Rossiyaning Qora dengiz sohilidagi Tuapse shahrida joylashgan yirik neftni qayta ishlash zavodi uchuvchisiz uchish apparatlari hujumiga uchradi. Bu haqda Zamin.uz xabar berdi.
Olingan so‘nggi ma’lumotlarga ko‘ra, mazkur zarba oqibatida zavod hududida kuchli yong‘in kelib chiqqan. Shuningdek, hodisa joyida texnogen holat yuz berib, dengiz suviga neft mahsulotlari to‘kilishi kuzatilgani aytilmoqda.
Rosneft kompaniyasiga tegishli bo‘lgan ushbu strategik obyektdagi yong‘inni to‘liq o‘chirish va uning asoratlarini bartaraf etish uchun mutaxassislar bir necha kun davomida ish olib borishgan. Siyosiy tahlilchilarning fikricha, Amerika Qo‘shma Shtatlari vositachiligida o‘tkazilishi kutilgan tinchlik muzokaralari to‘xtab qolishi hamda xalqaro hamjamiyat e’tibori boshqa mintaqalarga qaratilishi ortidan bunday hujumlar sezilarli darajada faollashgan.
Keltirilgan ma’lumotlarga tayansak, joriy yilning mart oyidan boshlab Kiyev ma’muriyati Rossiyaning energetika va sanoat obyektlariga qaratilgan zarbalar ko‘lamini kengaytirgan. Aprel oyi o‘rtalarida amalga oshirilgan navbatdagi dron hujumidan so‘ng, Tuapse neftni qayta ishlash zavodi o‘z ish faoliyatini vaqtincha to‘xtatishga majbur bo‘ldi.
Bu holat korxonaning ishlab chiqarish quvvatiga salbiy ta’sir ko‘rsatishi kutilmoqda. Ma’lumot o‘rnida shuni ta’kidlash joizki, Tuapse neftni qayta ishlash zavodi mintaqadagi eng yirik korxonalardan biri hisoblanadi.
Uning yillik quvvati taxminan 12 million tonna xomashyoni tashkil etadi, bu esa kuniga o‘rtacha 240 ming barrel neft qayta ishlanishini anglatadi. Mazkur zavodda asosan nafta, dizel yoqilg‘isi, mazut va vakuumli gazoyl kabi muhim mahsulotlar ishlab chiqariladi va ular nafaqat ichki bozor, balki eksport uchun ham katta ahamiyatga ega.
Hozirda korxonadagi shikastlangan uskunalarni qayta tiklash ishlari davom etmoqda.
