Donald Tramp va Qirol Charlz uchrashuvi shov-shuvga sabab bo‘ldi
Oq uy ma’muriyati tomonidan ijtimoiy tarmoqlarda e’lon qilingan yangi surat jahon siyosiy doiralari va keng jamoatchilik o‘rtasida katta shov-shuvga sabab bo‘ldi. Bu haqda Zamin.uz xabar berdi.
Amerika Qo‘shma Shtatlari prezidenti Donald Tramp va Buyuk Britaniya monarxi Charlz uchinchi o‘rtasidagi rasmiy uchrashuv Ikki qirol iborasi bilan taqdim etildi. Mazkur ramziy ma’noga ega voqea va uning ortidagi siyosiy jarayonlar ko‘plab savollarni keltirib chiqarmoqda.
Buyuk Britaniya qiroli Charlz uchinchi va qirolicha Kamillaning Qo‘shma Shtatlarga amalga oshirgan tashrifi davomida olingan surat Oq uyning rasmiy sahifasida paydo bo‘ldi. Oq uy oldidagi yashil maysazorda kulib turgan prezident va monarxning tasviri ostiga Ikki qirol deb izoh qoldirilgan.
Ushbu salomlashuv marosimi aslida ikki davlat o‘rtasidagi aloqalarning yuqori darajasini ifodalashi lozim edi, biroq ishlatilgan ibora siyosiy tahlilchilarning jiddiy e’tiborini tortdi. Xalqaro nashrlarning qayd etishicha, Donald Tramp o‘z boshqaruvi davomida tez-tez monarxiya timsollaridan foydalanib keladi.
Masalan, u avvalroq sun’iy intellekt yordamida tayyorlangan videoni e’lon qilgan edi. Unda prezident toj kiygan holda qiruvchi samolyotni boshqarib, o‘ziga qarshi namoyish o‘tkazayotganlar ustidan uchib o‘tadi.
Shuningdek, boshqa bir videolavhada Tramp qirollik liboslarida va qilich bilan tasvirlangan bo‘lib, unda siyosiy raqiblari uning qarshisida tizzalab turgani aks etgan. Hatto u o‘zini diniy timsollar bilan bog‘lovchi suratlarni ham ulashgan, biroq keskin tanqidlardan so‘ng ularni o‘chirib tashlashga majbur bo‘lgan.
Prezidentning bunday ramziy chiqishlari fonida AQShning deyarli barcha shtatlarida Yo‘qolsin qirollar deb nomlangan harakat faollashgan. Mamlakat tarixidagi yirik norozilik aksiyalari davomida namoyishchilar avtoritarizmdan voz kechish va demokratik qadriyatlarga qaytishni talab qilmoqdalar.
Shuningdek, migratsiya xizmatining qattiqqo‘l siyosatiga chek qo‘yish va tashqi siyosatdagi keskinliklarni yumshatish asosiy talablar qatoridan joy olgan. Kongressdagi respublikachilar yetakchilari esa ushbu mitinglarni davlatga nisbatan nafrat ifodasi deb baholashda davom etmoqdalar.
Shunga qaramay, mazkur norozilik shiorlari Tramp boshqaruvidagi eng muhim siyosiy omillardan biriga aylandi. Davlat rahbarining o‘zini monarxiya ramzlari bilan bog‘lashi zamonaviy demokratiya tamoyillariga qanchalik mos kelishi bugungi kunda qizg‘in muhokama qilinayotgan mavzulardan biri bo‘lib qolmoqda.
Amerikadagi bunday ichki siyosiy ziddiyatlar nafaqat mamlakatning o‘ziga, balki jahon iqtisodiyoti va xavfsizligiga ham o‘z ta’sirini o‘tkazmay qolmaydi.
