Jeffri Epshteynning qamoqxonadagi maxfiy maktubi haqida yangi ma’lumotlar e’lon qilindi
Amerika Qo‘shma Shtatlarida og‘ir jinoyatlarda ayblangan va qamoqxonada vafot etgan moliyachi Jeffri Epshteyn ishi bo‘yicha yangi ma’lumotlar jamoatchilik e’tiboriga havola etildi. Bu haqda Zamin.uz xabar berdi.
Uning sobiq kameradoshi Nikolas Tartalone Epshteyn o‘limidan biroz avval yozgan deb taxmin qilinayotgan maxfiy maktub mazmuni haqida so‘zlab berdi. Bu haqda nufuzli nashrlar, jumladan, Nyu-York Tayms gazetasi batafsil ma’lumot e’lon qildi.
Mazkur xabar Epshteynning sirli o‘limi atrofidagi turli taxminlarni yana bir bor kun tartibiga chiqardi. Ma’lumotlarga ko‘ra, Tartalone ushbu yozuvni 2019-yilning iyul oyida, Epshteyn hali hayot bo‘lgan vaqtda tasodifan topib olgan.
O‘sha paytda moliyachi qamoqxonada bo‘ynida shubhali jarohat izlari bilan hushsiz holatda topilgan edi. Ushbu voqeadan so‘ng u boshqa bo‘limga ko‘chirilgan va o‘z joniga qasd qilish xavfi mavjudligi sababli maxsus nazorat ostiga olingan edi.
Tartalone o‘z ko‘rsatmalarida yozuvni qanday topganini aniq bayon qilgan. Uning aytishicha, Epshteyn boshqa kameraga o‘tkazilgandan so‘ng, u kamerasida qolgan kitoblardan birini ko‘zdan kechirgan va uning ichiga yashirilgan sariq rangli qog‘oz parchasini ko‘rib qolgan.
Mazkur yozuvda tergovchilar Epshteynning faoliyatini bir necha oy davomida sinchkovlik bilan tekshirgan bo‘lsa-da, unga qarshi hech qanday dalil topilmagani haqida so‘z borgan. Shuningdek, maktubda Epshteynning ruhiy holatini aks ettiruvchi jumlalar ham mavjud bo‘lib, unda xayrlashish vaqti kelgani va atrofidagilar undan nima kutayotgani haqidagi savollar o‘rin olgan.
Bu holat Epshteynning o‘sha paytdagi ruhiy bosim ostida bo‘lganidan dalolat berishi mumkin. E’tiborli jihati shundaki, dastlab Epshteyn qamoqxona xodimlariga bo‘ynidagi jarohatlar uchun aynan Tartaloneni ayblagan edi.
U o‘z joniga qasd qilish niyati yo‘qligini qat’iy ta’kidlagan. Biroq oradan ko‘p o‘tmay u o‘z fikridan qaytgan va kameradoshi bilan hech qanday muammosi yo‘qligini, o‘zini butunlay xavfsiz his qilayotganini bildirgan.
Tartalone ushbu yozuvni o‘z himoyasi uchun advokatlariga topshirganini aytgan. Uning fikricha, agar Epshteyn uni ayblashda davom etsa, bu hujjat sudda uning aybsizligini isbotlash uchun xizmat qilishi kerak edi.
Keyinchalik ushbu hujjatning haqiqiyligini tekshirish uchun maxsus ekspertlar jalb etilgan. Ma’lumotlarga ko‘ra, maktub federal sud tomonidan boshqa bir jinoyat ishi doirasida maxfiylashtirilgan.
Tartalonening advokatlari yozuvning haqiqiyligini tasdiqlagan bo‘lsa-da, bu xulosa qanday dalillarga asoslangani ochiqlanmagan. Tahlilchilarning fikricha, ushbu yangi tafsilotlar Jeffri Epshteyn ishi atrofidagi tushunarsiz holatlarni yanada ko‘paytiradi va uning o‘limi bilan bog‘liq bahs-munozaralarning yangi to‘lqinini keltirib chiqaradi.
