Eronda Isroil foydasiga josuslik qilgan uch kishi qatl etildi
Eron Islom Respublikasining shimoli-g‘arbiy qismida joylashgan G‘arbiy Ozarbayjon viloyatida Isroil razvedka xizmati foydasiga josuslik qilganlikda ayblangan ikki shaxsga nisbatan chiqarilgan o‘lim hukmi ijro etildi. Bu haqda Zamin.uz xabar berdi.
Yoqub Karimpur va Nosir Bekarzoda ismli ushbu fuqarolar xorijiy maxsus xizmatlar bilan hamkorlik qilib, mamlakat xavfsizligiga rahna solishda aybdor deb topilgan. Shuningdek, Isfahon viloyatidagi Natanz yadroviy inshooti yaqinida maxfiy ma’lumotlarni to‘plash bilan shug‘ullangan yana bir shaxsga nisbatan ham qatl jazosi qo‘llanilgan.
Eron Oliy sudi ushbu jarayonlar qonuniy asosda yakuniga yetkazilganini va hukm bugun erta tongda ijro etilganini rasman tasdiqladi. Sud hujjatlarida keltirilishicha, ayblanuvchilar xorijiy razvedka xodimlari bilan muntazam aloqada bo‘lib, maxfiy ma’lumotlarni uzatish evaziga kriptovalyuta ko‘rinishida haq olib kelishgan.
Ular Eronning muhim strategik manzillari, davlat arboblari va soha mutaxassislari haqidagi ma’lumotlarni to‘plash bilan shug‘ullangan. Bundan tashqari, mahkumlar portlovchi qurilmalarni yasash bo‘yicha maxsus tayyorgarlikdan o‘tib, mamlakatning turli hududlarida bir qator qo‘poruvchilik harakatlarini amalga oshirganlikda ayblangan.
Amalga oshirilgan portlashlar va tartibsizliklar tasvirlangan videolavhalar xorijiy axborot vositalari orqali tarqatilib, mamlakatdagi siyosiy barqarorlikka putur yetkazish maqsad qilingan. Tergov jarayonida aniqlanishicha, Yoqub Karimpur turli jinoiy guruhlarni yollab, Karaj va Mashhad shaharlarida davlat mulkiga zarar yetkazish, xususan, bankomatlarga o‘t qo‘yish kabi harakatlarni tashkil qilgan.
Shu bilan birga, josuslar Natanz uranni boyitish zavodi kabi o‘ta muhim obektlarning joylashuv xaritalari va suratlarini dushman tomoniga taqdim etgan. Eron xavfsizlik kuchlari ushbu shaxslarning faoliyatini uzoq vaqt kuzatib, barcha dalillarni to‘plaganidan so‘ng ularni qo‘lga olgan.
Oliy sud bayonotiga ko‘ra, barcha sud instansiyalari ko‘rib chiqqan qaror o‘zgarishsiz qoldirilgan va mahkumlar osib o‘ldirish yo‘li bilan qatl etilgan.
