Gazo aholisi endi och qolgan kemiruvchilar hujumidan aziyat chekmoqda
Gazo hududidagi gumanitar inqiroz kundan-kunga chuqurlashib, hudud aholisi yangi va kutilmagan tahdidlarga duch kelmoqda. Bu haqda Zamin.uz xabar berdi.
So‘nggi ma’lumotlarga ko‘ra, vaqtinchalik chodirlarda va vayronalar orasida jon saqlayotgan falastinliklar endilikda kalamushlar va boshqa turdagi kemiruvchilar hujumidan aziyat chekmoqda. Bu holat ayniqsa tunda dam olayotgan aholi, xususan, yosh bolalar uchun jiddiy xavf tug‘dirmoqda.
Guvohlarning so‘zlariga ko‘ra, och qolgan kemiruvchilar tunda uxlab yotgan go‘daklarga hujum qilib, ularning qo‘l va oyoqlarini tishlab jarohatlamoqda. Gazo sektorida davom etayotgan qurolli to‘qnashuvlar oqibatida ikki milliondan ortiq inson o‘z uy-joyini tashlab chiqishga majbur bo‘lgan.
Bugungi kunda ular sanitariya talablariga mutlaqo javob bermaydigan sharoitlarda, ochiq osmon ostidagi lagerlarda yashamoqda. Xon Yunus shahridagi lagerlardan birida istiqomat qiluvchi Amani Abu Selmi ismli ayolning hikoya qilishicha, kemiruvchilar uning to‘y marosimi uchun tayyorlab qo‘yilgan barcha liboslari va buyumlarini g‘ajib, yaroqsiz holga keltirgan.
Bu kabi holatlar aholining nafaqat jismoniy, balki ruhiy holatiga ham salbiy ta’sir ko‘rsatmoqda. Lagerda yashovchi yana bir fuqaro Halil al-Mashharaviyning ta’kidlashicha, uning uch yoshli farzandi tunda kalamush tishlashi oqibatida jarohat olgan.
Ota-onalar farzandlarining xavfsizligidan xavotirda bo‘lib, tun bo‘yi navbat bilan poyloqchilik qilishga majbur bo‘lishmoqda. Kemiruvchilar nafaqat odamlarga jarohat yetkazmoqda, balki kam sonli oziq-ovqat zaxiralari va kiyim-kechaklarni ham yo‘q qilmoqda.
Bu esa ongsiz ravishda ochlik va muhtojlik darajasini yanada oshirmoqda. Tibbiyot mutaxassislari, xususan, Al-Shifa shifoxonasi rahbariyati ushbu vaziyatdan jiddiy tashvishda ekanini bildirmoqda.
Kemiruvchilarning ko‘payishi turli yuqumli kasalliklar, jumladan, leptospiroz va og‘ir isitma kabi xavfli infeksiyalarning keng tarqalishiga sabab bo‘lishi mumkin. Sanitariya vositalarining yetishmasligi va issiq ob-havoning yaqinlashishi muammoni yanada murakkablashtirishi kutilmoqda.
Garchi hududga ma’lum miqdorda zararkunandalarga qarshi vositalar olib kirishga ruxsat berilgan bo‘lsa-da, aholi bu choralar muammoni hal qilish uchun yetarli emasligini aytmoqda.
