Isroil armiyasi muqaddas haykalni tahqirlagan askar ustidan tekshiruv boshladi
Ijtimoiy tarmoqlarda isroillik harbiy xizmatchining Livandagi Bibi Maryam haykalini tahqirlayotgani aks etgan surat keng tarqalishi ortidan Isroil mudofaa kuchlari rasmiy tekshiruv boshladi. Bu haqda Zamin.uz xabar berdi.
Bu haqda Al Jazeera nashri xabar bermoqda. Ma’lum qilinishicha, Isroil armiyasi rahbariyati mazkur holatga o‘ta jiddiy munosabat bildirishini hamda aybdor askarga nisbatan qat’iy choralar ko‘rilishini ma’lum qilgan.
Ushbu surat bir necha hafta muqaddam Livanning asosan nasroniylar istiqomat qiladigan Debel qishlog‘ida tasvirga olingan bo‘lib, may oyi boshida internet tarmoqlarida ommalashib ketdi. Suratda isroillik askarning muqaddas sanalgan haykal og‘ziga sigaret qo‘ygani va o‘zi ham tamaki chekib, masxaromuz holatda turgani aks etgan.
Kuzatuvchilarning ta’kidlashicha, bu Livan janubida isroillik harbiylar tomonidan diniy qadamjolarni oyoqosti qilish, o‘zgalar mulkini vayron etish va talon-toroj qilish bilan bog‘liq ketma-ket sodir bo‘layotgan voqealarning bir qismidir. Masalan, joriy yilning aprel oyida ham aynan shu qishloqda Isroil askari Iso Masih haykalini bolg‘a bilan urib shikastlagani haqida xabarlar tarqalgan edi.
O‘shanda haykalga zarar yetkazgan askar va uni videoga olgan hamkasbi jangovar vazifalardan chetlatilib, o‘ttiz sutkaga qamoq jazosiga mahkum etilgan edi. Bundan tashqari, Isroil qo‘shinlari Debel qishlog‘idagi aholi foydalanadigan quyosh panellarini buldozerlar yordamida yo‘q qilgani, uylar, yo‘llar va asrlik zaytun daraxtlariga ham jiddiy zarar yetkazgani aytilmoqda.
Ushbu nojo‘ya harakatlar Isroilning Bayrut va Livanning boshqa hududlariga havo hujumlarini kuchaytirayotgan bir vaqtda yuz bermoqda. Isroil tomoni bu harbiy amaliyotlarni Hizbulloh harakati jangchilari hamda ularning infratuzilmasiga qarshi kurash sifatida izohlamoqda.
Biroq amalda Livan janubidagi qator aholi punktlari va diniy obidalarning vayron qilinishi xalqaro hamjamiyatda jiddiy e’tirozlarga sabab bo‘lmoqda. Ayni paytda Isroil qo‘shinlari ushbu hududlarda nazoratni saqlab turish va qishloqlarni vayron qilishda davom etayotgani ta’kidlanmoqda.
