Putin Zelenskiy bilan yuzma-yuz muloqot qilishga tayyorligini bildirdi
Rossiya prezidenti Vladimir Putin Ukraina inqirozini bartaraf etish bo‘yicha aniq to‘xtamga kelinganidan so‘ng, Volodimir Zelenskiy bilan yuzma-yuz muloqot qilishga tayyorligini ma’lum qildi. Bu haqda Zamin.uz xabar berdi.
Moskva shahrida o‘tkazilgan tantanali tadbirlardan so‘ng jurnalistlar bilan uchrashgan davlat rahbari Ukraina atrofidagi vaziyat va kelajakdagi ehtimoliy bitimlar yuzasidan o‘z mulohazalarini bayon etdi. Putinning so‘zlariga ko‘ra, Rossiya tomoni hech qachon muloqotlardan qochmagan va agar Ukraina rahbariyati chin dildan uchrashishni istasa, Moskva bunga qarshilik ko‘rsatmaydi.
Shu bilan birga, Rossiya yetakchisi bunday uchrashuvning joyi va vaqti masalasiga ham to‘xtalib o‘tdi. U muzokaralar nafaqat Rossiya yoki Ukraina hududida, balki uchinchi bir davlatda ham tashkil etilishi mumkinligini inkor etmadi.
Biroq prezident oliy darajadagi muloqot shunchaki suhbatlashish uchun emas, balki ikki davlat mutaxassislari tomonidan puxta tayyorlangan yakuniy hujjatni imzolash uchun xizmat qilishi zarurligini alohida ta’kidladi. Uning fikricha, davlat rahbarlarining uchrashuvi uzoq davom etgan jarayonlarga yakuniy nuqta qo‘yishi lozim.
Putin o‘z tajribasidan kelib chiqib, Minsk kelishuvlari davridagi samarasiz muzokaralarni esladi. O‘shanda soatlab, hatto tunu kun davom etgan muloqotlar kutilgan natijani bermaganini qayd etdi.
Shu sababli, avval diplomatlar va ishchi guruhlar har ikki tomon manfaatlariga mos keladigan loyihani tayyorlashi, shundan keyingina rahbarlar uchrashib, rasmiy bitimga imzo chekishlari maqsadga muvofiq ekanini bildirdi. Rossiya rahbari ayni paytda mojaro ma’lum bir bosqichga yetib kelganini va vaziyat murakkab bo‘lsa-da, yechim sari qadam tashlanayotganini qayd etdi.
Shuningdek, brifing davomida 2022-yilda Istanbulda bo‘lib o‘tgan muzokaralar jarayoni ham tilga olindi. Putinning ta’kidlashicha, o‘sha paytda tomonlar kelishuvga juda yaqin kelishgan, ammo G‘arb siyosatchilarining aralashuvi sababli jarayon to‘xtab qolgan.
Xususan, Buyuk Britaniyaning sobiq bosh vaziri Boris Jonsonning pozitsiyasi va Fransiya prezidenti Emmanuel Makron bilan bo‘lgan muloqotlar natijasida Ukraina tomoni avvalgi kelishuvlardan voz kechgan. Rossiya prezidenti o‘shanda erishilgan hujjatlar Ukraina vakillari tomonidan ma’qullanganini, biroq tashqi bosim tufayli adolatsiz deb topilganini tanqidiy ruhda eslatib o‘tdi.
