Sankt Peterburgda ko'chada namoz o'qigan o'zbekistonlik Rossiyadan haydaladi

Rossiya Federatsiyasining Sankt-Peterburg shahrida ko‘chada namoz o‘qigan O‘zbekiston fuqarosi missionerlik faoliyatini yuritishda ayblanib, mamlakat hududidan chiqarib yuboriladigan bo‘ldi. Bu haqda Zamin.uz xabar berdi.

Mazkur voqea haqida Sankt-Peterburg sudlari matbuot xizmati rahbari Darya Lebedeva ma’lumot berdi. Olingan ma’lumotlarga ko‘ra, voqea joriy yilning 12-may kuni Savushkin ko‘chasida yuz bergan.

Huquqni muhofaza qilish organlari xodimlari Dadaboyev familiyali O‘zbekiston fuqarosini jamoat joyida namoz o‘qiyotgan vaqtida aniqlagan. Shundan so‘ng unga nisbatan missionerlik faoliyati bilan shug‘ullanganlik aybi qo‘yilgan.

Sud vakilining tushuntirishicha, ayblanuvchi tegishli ruxsatnoma va vakolatga ega bo‘lmagan holda imom sifatida diniy marosim o‘tkazgan deb baholangan. Shuningdek, u mahalliy davlat hokimiyati idoralari bilan kelishmasdan, jamoat joyida namoz ibodatini ado etgani alohida ta’kidlangan.

O‘zbekiston fuqarosi chet el fuqarosi sifatida Rossiya Federatsiyasi Ma’muriy javobgarlik to‘g‘risidagi kodeksining tegishli moddasi asosida javobgarlikka tortilgan. Sud majlisi davomida u o‘z aybiga iqror bo‘lib, ko‘chada namoz o‘qish taqiqlanganidan bexabar bo‘lganini ma’lum qilgan.

Sudning yakuniy qaroriga binoan, fuqaroga o‘ttiz ming rubl miqdorida jarima tayinlangan. Shu bilan birga, u Rossiya hududidan majburiy tartibda chiqarib yuborilishi belgilangan.

Eslatib o‘tish joizki, Rossiyada bunday holatlar avval ham kuzatilgan. Masalan, joriy yilning fevral oyida yotoqxona eshigini ochiq qoldirgan holda namoz o‘qigan boshqa bir O‘zbekiston fuqarosi ham missionerlikda ayblanib, jarimaga tortilgan va mamlakatdan chiqarib yuborilgan edi.

Rossiya qonunchiligiga ko‘ra, diniy amallar faqat belgilangan maxsus joylarda bajarilishi talab etiladi.