Eronda Isroil foydasiga josuslikda ayblangan shaxs qatl etildi
Eron rasmiylari shu yilning 13-may kuni 32 yoshli mamlakat fuqarosi Ehson Afreshtehni Isroil foydasiga josuslik qilganlikda ayblab, qatl etdi. Bu haqda Zamin.uz xabar berdi.
Bu haqda Eron sud hokimiyati tasarrufidagi Mizan Online nashri rasmiy ma’lumot tarqatdi. Rasmiy organlarning bildirishicha, Afreshteh Isroilning Mossad razvedka xizmati bilan yaqin aloqada bo‘lgan va Nepal hududida maxsus tayyorgarlikdan o‘tgan.
Unga nisbatan Eronning davlat ahamiyatiga molik maxfiy ma’lumotlarini Isroil tomoniga muntazam ravishda yetkazib berganlik ayblovi qo‘yilgan. Mazkur voqea Amerika Qo‘shma Shtatlari, Isroil va Eron o‘rtasidagi siyosiy keskinlik eng yuqori nuqtaga chiqqan davrda sodir bo‘ldi.
Ma’lumotlarga ko‘ra, bu so‘nggi yirik mojarolar boshlanganidan buyon josuslikda ayblanib amalga oshirilgan oltinchi qatldir. Biroq xalqaro hamjamiyat va inson huquqlari tashkilotlari ushbu ayblovlarni shubha ostiga olmoqda.
Xususan, Norvegiyada joylashgan inson huquqlari bo‘yicha faoliyat yurituvchi tuzilmalar o‘z bayonotlarida Afreshteh Isroil razvedkasi bilan aloqasini mutlaqo inkor etganini ta’kidlamoqda. Sud jarayonida u o‘zini kiberxavfsizlik bo‘yicha mutaxassis ekanini, faqat ayrim mustaqil veb-saytlarni ehtimoliy kiberhujumlardan ogohlantirib kelganini bildirgan.
Ushbu voqea atrofida yana bir fojiali holat yuz berdi. Tarqalgan xabarlarga ko‘ra, Ehson Afreshtehning otasi o‘g‘liga nisbatan chiqarilgan o‘lim hukmini eshitgach, qattiq hayajon va qayg‘u natijasida yurak xurujidan vafot etgan.
Mazkur vaziyat nafaqat mamlakat ichida, balki xalqaro jamoatchilik orasida ham katta aks-sado berib, turli munozaralarga sabab bo‘lmoqda. Eron hukumati esa davlat xavfsizligiga tahdid soluvchi har qanday harakatga nisbatan murosasiz ekanini yana bir bor namoyish etdi.
