Markaziy Osiyo davlatlari suv iste’moli bo‘yicha jahon reytingida yuqori o‘rinlarni egalladi

Markaziy Osiyo davlatlari aholi jon boshiga to‘g‘ri keladigan suv iste’moli miqdori bo‘yicha jahon reytingida yuqori o‘rinlarni egalladi. Bu haqda Zamin.uz xabar berdi.

Worldometer portali tomonidan e’lon qilingan suvdan foydalanish global indeksiga ko‘ra, mintaqa mamlakatlari birinchi o‘ntalikdan joy olgan. Ushbu ro‘yxatda Turkmaniston dunyo miqyosida peshqadamlik qilayotgan bo‘lsa, O‘zbekiston mintaqadagi qo‘shni davlatlar orasida uchinchi pog‘onada qayd etildi.

Tadqiqot natijalariga ko‘ra, yillik suv iste’molining umumiy hajmi bo‘yicha O‘zbekiston mintaqada eng katta ko‘rsatkichga ega bo‘lib, bu miqdor 54,56 milliard kubometrni tashkil etmoqda. Undan keyingi o‘rinlarda Turkmaniston 27,9 milliard, Qozog‘iston 22,77 milliard va Tojikiston 11,49 milliard kubometr ko‘rsatkich bilan joylashgan.

Mintaqadagi eng kam suv iste’moli Qirg‘iziston hissasiga to‘g‘ri kelib, yillik ko‘rsatkich qariyb 8 milliard kubometrga teng bo‘ldi. Aholi jon boshiga kunlik o‘rtacha suv sarfi bo‘yicha Turkmaniston dunyoda mutlaq yetakchi sifatida e’tirof etildi.

Mazkur mamlakatda bir kishi bir kunda o‘rtacha 15 445 litr suv ishlatadi. Suv resurslaridan eng ko‘p foydalanuvchi davlatlar o‘ntaligiga Chili va Gayana kabi mamlakatlar ham kiritilgan.

O‘zbekistonda bu ko‘rsatkich bir kishi uchun kuniga 4778 litrni, Tojikistonda 4460 litrni, Qirg‘izistonda esa 4153 litrni tashkil qilmoqda. Shuningdek, suvni eng ko‘p sarflaydigan o‘nta davlat qatoridan Amerika Qo‘shma Shtatlari, Eron, Estoniya va Ozarbayjon ham o‘rin olgan.

Qozog‘istonda esa kunlik o‘rtacha suv sarfi mintaqa bo‘yicha eng past darajada bo‘lib, bir kishi hisobiga 3397 litrga teng bo‘ldi. Aksincha, suvdan eng tejamkor foydalanish darajasi Afrika qit’asida, xususan, Kongo Demokratik Respublikasida kuzatilgan.

Bu mamlakatda bir kishi bir kunda atigi 32 litr suv bilan kifoyalanadi. Mutaxassislarning ta’kidlashicha, bunday yuqori iste’mol ko‘rsatkichlari sharoitida O‘zbekistonda suv resurslaridan oqilona foydalanish masalasi dolzarb bo‘lib qolmoqda.

Shu sababli mamlakatimizda suvning maqsadsiz sarflanishiga qarshi choralar kuchaytirilib, sug‘orish tizimlari va kanallarni modernizatsiya qilishga qaratilgan davlat dasturlari izchil amalga oshirilmoqda. Tejamkor texnologiyalarni joriy etish orqali suv yo‘qotishlarini kamaytirish bugungi kunning asosiy vazifalaridan biri hisoblanadi.