Qozog‘istonda mintaqada birinchi bo‘lib sun’iy yomg‘ir yog‘dirish boshlandi
Qozogiston mintaqada birinchi bo‘lib sun’iy yomg‘ir yog‘dirish texnologiyasini amaliyotga tatbiq etishni boshladi. Bu haqda Zamin.uz xabar berdi.
Shu yilning o‘rtalarida Turkiston viloyatida ushbu loyihani ishga tushirishga bag‘ishlangan rasmiy tadbir bo‘lib o‘tdi. Mazkur tashabbus iqlim o‘zgarishi sharoitida suv resurslarini boshqarishning yangi bosqichi sifatida baholanmoqda.
Mamlakatning mas’ul vazirliklari bergan ma’lumotga ko‘ra, qo‘llanilayotgan yangi usul yordamida hududdagi yog‘ingarchilik miqdorini tabiiy ko‘rsatkichlarga nisbatan o‘n foizdan yigirma foizgacha oshirish imkoniyati mavjud. Bu jarayon atmosferadagi bulut qatlamlariga maxsus moddalar bilan ta’sir ko‘rsatish orqali amalga oshiriladi.
Natijada kutilganidan ko‘proq namlik hosil bo‘lib, u yerga yomg‘ir ko‘rinishida tushadi. Loyiha asosan suv tanqisligi muammosini hal etish, suv omborlaridagi zaxiralarni ko‘paytirish hamda qishloq xo‘jaligi yerlarini barqaror suv bilan ta’minlashga yo‘naltirilgan.
Mutaxassislarning ta’kidlashicha, ushbu texnologiya deyarli bir million gektarga yaqin ekin maydonlarida qurg‘oqchilik xavfini kamaytirishga xizmat qiladi. Bu esa o‘z navbatida oziq-ovqat xavfsizligini ta’minlashda muhim ahamiyat kasb etadi.
Dastlabki hisob-kitoblarga ko‘ra, sun’iy yomg‘ir yog‘dirish tizimining yo‘lga qo‘yilishi qishloq xo‘jaligi sohasidagi samaradorlikni sezilarli darajada oshiradi. Loyihaning muvaffaqiyatli amalga oshishi natijasida Qozogiston iqtisodiyotiga har yili o‘rtacha o‘ttiz besh milliard tenge miqdorida qo‘shimcha daromad keltirilishi kutilmoqda.
Bu kabi zamonaviy yondashuvlar Markaziy Osiyoning boshqa davlatlari uchun ham suv tejash va hosildorlikni oshirishda namuna bo‘lishi mumkin.
