Afg‘onistonda ota oilasini boqish uchun qizini sotishga majbur bo‘lmoqda
Afgonistonning Gur viloyatida istiqomat qiluvchi Abdul Rashid Azimiy ismli shaxs oilasini ocharchilikdan saqlab qolish maqsadida yetti yoshli qizini sotishga majbur bo‘layotganini ma’lum qildi. Bu haqda Zamin.uz xabar berdi.
Bu haqda xalqaro nashrlar xabar tarqatmoqda. Hozirgi kunda Afgonistonda besh millionga yaqin inson ocharchilik xavfi ostida yashayotgan bo‘lib, Gur viloyati iqtisodiy inqirozdan eng ko‘p zarar ko‘rgan hududlardan biri hisoblanadi.
Abdul Rashidning Roqiya va Rohila ismli egizak qizlari bor. Uning ta’kidlashicha, oiladagi og‘ir moliyaviy ahvol va to‘plangan qarzlar uni qizlaridan birini sotish haqida o‘ylashga majbur qilgan.
Ota o‘z farzandlarini uy ishlari uchun xizmatkor sifatida yoki kelajakda turmushga berish sharti bilan sotishga tayyorligini bildirdi. Uning so‘zlariga ko‘ra, bir qizini sotish orqali olingan mablag‘ qolgan farzandlarini kamida to‘rt yil davomida oziq-ovqat bilan ta’minlashga imkon beradi.
Oilaning onasi Kayxan esa xonadonda hatto choy ichishga ham imkon yo‘qligini, ular faqat non va qaynoq suv bilan kun kechirayotganini aytdi. Mamlakatda o‘gil bolalar oilaning kelajakdagi boquvchisi sifatida ko‘rilgani sababli, iqtisodiy qiyinchiliklar davrida aynan qiz bolalar qurbon qilinmoqda.
Ayollarning ta’lim olishi va ishlashiga qo‘yilgan cheklovlar bu muammoni yanada chuqurlashtirmoqda. Shuningdek, nikoh paytida qizning oilasiga to‘lanadigan qalin puli an’anasi ham bunday ayanchli savdolarga sabab bo‘lmoqda.
Abdul Rashidning o‘smir yoshdagi o‘gillari shaharda poyabzal tozalash va chiqindi yig‘ish bilan shug‘ullanib, oilaga yordam berishga harakat qilsa-da, bu daromad ehtiyojlarni qoplashga yetmayapti. Shunga o‘xshash vaziyat yana bir afgonistonlik Said Ahmadning xonadonida ham kuzatilgan.
U besh yoshli qizi Shayqani og‘ir xastalikdan qutqarish uchun qarindoshiga sotishga majbur bo‘lgan. Qizaloqda aniqlangan jigar o‘smasi va boshqa kasalliklarni davolatish uchun zarur bo‘lgan uch ming dollardan ortiq mablag‘ qizning sotilishi evaziga topilgan.
Kelishuvga ko‘ra, qizaloq besh yildan so‘ng o‘sha qarindoshining o‘gliga turmushga chiqishi uchun ularning uyiga ketishi lozim. Birlashgan Millatlar Tashkilotining ma’lumotlariga ko‘ra, Afgonistonga ko‘rsatilayotgan xalqaro insonparvarlik yordami hajmi keskin kamayib bormoqda.
Bu esa mamlakatdagi ijtimoiy va iqtisodiy vaziyatni yanada og‘irlashtirib, voyaga yetmagan qizlarni sotish va erta turmushga berish kabi fojiali holatlarning ko‘payishiga olib kelmoqda. Ota-onalar farzandlarining hayotini saqlab qolish uchun boshqa chorasiz qolayotganliklarini bildirishmoqda.
