Eron oliy rahnamosining salomatligi borasidagi yangi tafsilotlar ma’lum qilindi
Amerika Qo‘shma Shtatlari va Isroil tomonidan amalga oshirilgan hujumlar natijasida jarohatlangan Eron oliy rahnamosi Mojtaba Xomanaiyning salomatligi borasida yangi tafsilotlar ma’lum qilindi. Bu haqda Zamin.uz xabar berdi.
Bu haqdagi ma’lumotlarni mamlakatning rasmiy IRNA axborot agentligi e’lon qildi. Eron Sog‘liqni saqlash vazirligi matbuot xizmati rahbari Husayn Kermanpur oliy rahnamoning holati haqida gapirar ekan, uning olgan jarohatlari tashqi ko‘rinishiga jiddiy zarar yetkazmaganini alohida ta’kidladi.
Kermanpurning so‘zlariga ko‘ra, Mojtaba Xomanaiyning yuzi yoki umumiy qiyofasi shikastlanmagan. Shuningdek, vazirlik vakili G‘arb ommaviy axborot vositalarida tarqalayotgan turli asossiz xabarlarga raddiya berib, jarohatlar tufayli biror a’zoning amputatsiya qilingani yoki nogironlik holati yuzaga kelgani haqidagi gaplar haqiqatga to‘g‘ri kelmasligini bildirdi.
Bu bayonotlar ijtimoiy tarmoqlarda tarqalgan turli taxminlarga chek qo‘yish maqsadida berildi. Eron oliy rahnamosi idorasi protokol xizmati rahbari Mazaher Husayniy ham Mojtaba Xomanaiyning sog‘lig‘i tiklanayotganini tasdiqladi.
Uning ma’lumot berishicha, hujumlar oqibatida rahnamo bel va tizza sohasidan jarohat olgan, shuningdek, qulog‘i orqasida yirtilgan jarohat izlari bo‘lgan. Hozirda barcha zaruriy tibbiy muolajalar amalga oshirilmoqda va uning umumiy ahvoli barqaror deb baholanmoqda.
Eslatib o‘tamiz, joriy yilning 28-fevral kuni Amerika va Isroil harbiy kuchlarining Eron hududiga uyushtirgan havo hujumlari natijasida mamlakatning sobiq oliy rahnamosi Oyatulloh Ali Xomanaiy vafot etgan edi. Shundan so‘ng, 9-martga o‘tar kechasi uning o‘g‘li Mojtaba Xomanaiy yangi oliy rahnamo etib saylandi.
Shunga qaramay, u uzoq vaqt davomida xalq oldida ko‘rinish bermadi va uning barcha murojaatlari faqat matn yoki ovozli shaklda taqdim etildi. Faqat 30-aprel kuniga kelibgina, Eron prezidenti Mas’ud Pezeshkiyon yangi rahnamo bilan shaxsan uchrashgani haqida rasmiy xabarlar e’lon qilindi.
