Fransiyadagi g‘ayritabiiy issiq havo oqibatida yetti kishi vafot etdi
Fransiyada hukm surayotgan g‘ayritabiiy issiq havo oqibatida kamida yetti kishi hayotdan ko‘z yumdi. Bu haqda Zamin.uz xabar berdi.
Mamlakatning bir qator hududlarida havo harorati may oyi uchun belgilangan rekord darajalardan ham yuqorilab ketdi. Bu holat aholi salomatligiga jiddiy xavf tug‘dirmoqda va tibbiyot xodimlarini hushyorlikka chorlamoqda.
Ommaviy axborot vositalarining xabar berishicha, vafot etganlarning besh nafari suv havzalarida cho‘kib ketgan, yana ikki kishi esa ochiq havoda o‘tkazilgan sport musobaqalari paytida vafot etgan. Bundan tashqari, o‘nlab fuqarolar sog‘lig‘i keskin yomonlashgani sababli shifoxonalarga yotqizilgan.
Shifokorlarning ma’lum qilishicha, ayrim bemorlarning ahvoli hamon og‘irligicha qolmoqda. Ob-havo ma’lumotlariga ko‘ra, mamlakatning janubi-g‘arbiy qismidagi ayrim hududlarda harorat 37 darajadan oshib ketgan.
Bu ko‘rsatkich Fransiya tarixidagi eng issiq may kunlaridan biri sifatida ro‘yxatga olindi. Bunday anomal issiqlik faqat Fransiya bilan cheklanib qolmasdan, boshqa Yevropa davlatlariga ham tarqalmoqda.
Xususan, Buyuk Britaniyada ham harorat rekord darajaga yetgan bo‘lsa, Ispaniyada sinoptiklar issiqlik 40 darajagacha ko‘tarilishini taxmin qilmoqda. Italiyaning ayrim hududlarida esa aholi salomatligini asrash maqsadida ochiq osmon ostida ishlashga rasmiy cheklovlar joriy etildi.
Mutaxassislar ushbu holatni global iqlim o‘zgarishi va Afrika qit’asidan kirib kelgan issiq havo oqimi bilan bog‘lamoqda. Ularning ta’kidlashicha, Yevropa hududi ustida o‘ziga xos issiq gumbazi hosil bo‘lgan bo‘lib, u yuqori haroratning uzoq vaqt davomida saqlanib qolishiga sabab bo‘lmoqda.
Ekspertlar kelajakda bunday issiq to‘lqinlari yanada tez-tez va shiddatliroq takrorlanishi mumkinligidan ogohlantirmoqda. Shu bilan birga, xalqaro prognoz markazlari O‘zbekistonda ham joriy yilda yoz fasli odatdagidan ko‘ra issiqroq kelishi ehtimoli yuqori ekanini bildirmoqda.
