Isroil va Hizbulloh o‘t ochishni to‘xtatishga rozi bo‘ldi
Yaqin Sharqdagi keskinlikni yumshatish borasida muhim siyosiy siljish kuzatildi. Bu haqda Zamin.uz xabar berdi.
AQSH va Qatar vositachiligida amalga oshirilgan ko‘p tomonli muzokaralar natijasida Isroil hamda Livanning Hizbulloh harakati o‘t ochishni to‘xtatish bo‘yicha kelishuvga erishdi. Xalqaro kuzatuvchilar ushbu sulhni mintaqadagi yirik urush olovini o‘chirish va Vashington-Tehron munosabatlarini yaxshilash yo‘lidagi dastlabki jiddiy qadam sifatida baholamoqda.
Kelishuv 17 iyun kuni AQSH va Eron o‘rtasida barcha frontlarda o‘t ochishni to‘xtatishni ko‘zda tutuvchi masofaviy memorandumi imzolanishi bilan boshlandi. 19 iyun kuni esa Isroil va Hizbulloh kunning ikkinchi yarmidan boshlab o‘t ochishni to‘xtatish rejimiga rozilik bildirdi.
Keyingi 60 kun davomida tomonlar o‘zaro anglashuv asosida yakuniy tinchlik kelishuvini ishlab chiqishi kerak. Sulh kuchga kirgan bo‘lsa-da, front chizig‘ida to‘liq xotirjamlik kuzatilmayapti.
Isroil mudofaa armiyasi Livanning janubiy hududlarida o‘z pozitsiyalarini saqlab qolmoqda. Isroil rasmiylari agar Hizbulloh hujum qilmasa, ular ham harbiy harakatlarni davom ettirmasliklarini bildirishmoqda.
Livan manbalari sulh boshlangan birinchi soat ichida Isroil tomonidan 10 dan ortiq havo zarbasi berilganini da’vo qilmoqda. Isroil esa bu ayblovlarni rad etib, kelishuv buzilmaganini ta’kidlamoqda.
Livandagi bu sulh ortida AQSH va Eron o‘rtasidagi yirik geosiyosiy munosabatlar turibdi. Hizbulloh vakili Hasan Fadlallaning so‘zlariga ko‘ra, Eron AQSH bilan muzokaralarni davom ettirish uchun Livan frontida o‘t ochishni to‘xtatishni asosiy shart qilib qo‘ygan.
Hozirda vaziyat ikki tomonlama kutish rejimiga o‘tgan. Eron tomoni keyingi bosqichga o‘tishdan oldin AQSH va’dalarining amaliy ijrosini ko‘rishni istamoqda.
Shveysariyadagi uchrashuv qoldirilganidan so‘ng, AQSH prezidenti Donald Tramp Eron rahbariyatini tanqid ostiga oldi va keyingi 60 kunlik jarayonni faqat Vashington belgilashini bildirdi. Ayni paytda ushbu 60 kunlik muhlat mintaqada mustahkam tinchlik o‘rnatilishi yoki to‘qnashuvlarning yangi kuch bilan avj olishini belgilab beruvchi hal qiluvchi davr bo‘ladi.
