Bangkokdagi tungi klubda yuz bergan yong'in oqibatida o'nlab kishilar halok bo'ldi
Tailand poytaxti Bangkok shahrida joylashgan, mahalliy aholi va sayyohlar orasida ommalashgan tungi klublardan birida mudhish fojia yuz berdi. Bu haqda Zamin.uz xabar berdi.
Kuchli alanga va quyuq tutun tufayli o‘nlab insonlar hayotdan ko‘z yumdi, ko‘plab fuqarolar esa og‘ir tan jarohatlari bilan shifoxonaga yotqizildi. Mazkur hodisa nafaqat Tailand jamoatchiligini, balki butun dunyoni larzaga keltirdi.
Hozirda mutaxassislar voqea joyida o‘rganish ishlarini olib bormoqda va halokatning dahshatli tafsilotlarini ochiqlamoqda. Fojia Bangkokning mashhur Chatuchak bozori yaqinida joylashgan dam olish maskanida, tungi vaqtda sodir bo‘lgan.
Rasmiy ma’lumotlarga ko‘ra, yong‘in oqibatida kamida yigirma yetti kishi halok bo‘lgan. Shifoxonaga jami oltmish uch nafar jabrlanuvchi olib borilgan bo‘lib, ularning yigirma ikki nafari o‘ta og‘ir ahvolda qolmoqda.
Shifokorlar jarohatlanganlarning hayotini saqlab qolish uchun bor imkoniyatlarini ishga solmoqdalar. Yong‘in boshlangan vaqtda bino ichida aniq qancha odam bo‘lgani hozircha ma’lum emas, biroq ushbu maskan bir vaqtning o‘zida uch yuz nafardan ortiq mijozni qabul qilish quvvatiga ega bo‘lgan.
Ijtimoiy tarmoqlarda tarqalgan videolarda odamlarning kuchli vahima ichida qochishga urinayotgani, bino eshiklaridan esa dahshatli alanga otilib chiqayotgani aks etgan. Guvohlarning so‘zlariga ko‘ra, hamma narsa bir necha soniya ichida sodir bo‘lgan va aksariyat insonlar tashqariga chiqishga ulgurmagan.
Pabda chiqish qilgan musiqachilardan biri baxtsiz hodisaning ilk soniyalarini eslar ekan, sahna yaqinidagi avtomatik elektr o‘chirgichdan tutun chiqayotganini ko‘rganini aytadi. Ko‘p o‘tmay butun binoda chiroqlar o‘chgan, shundan so‘ng kuchli portlashga o‘xshash ovoz eshitilgan va ichkarini soniyalar ichida quyuq tutun qoplagan.
Ko‘rinish masofasi keskin kamayib ketgani sababli odamlar chiqish eshiklarini topishda qiynalishgan. Bangkok shahar ma’muriyati rahbarining ta’kidlashicha, olov juda tez tarqalgan va qisqa fursatda bino shiftigacha yetib borgan.
Dastlabki ekspertiza xulosalariga ko‘ra, odamlarning aksariyati bevosita kuyishdan emas, balki zaharli tutundan nafas qisishi oqibatida halok bo‘lishgan. Tergovchilarni shubhaga solayotgan eng asosiy jihat shundaki, ayrim jasadlar aynan yong‘in chiqish eshigi oldida topilgan.
Binoda to‘rtta favqulodda chiqish yo‘li mavjud bo‘lishiga qaramay, odamlarning u yerda qolib ketishi evakuatsiya yo‘llari to‘sib qo‘yilgan bo‘lishi mumkinligidan dalolat bermoqda. Hozirda mahalliy politsiya va qutqaruv xizmatlari voqea joyida surishtiruv ishlarini davom ettirmoqda.
Mutaxassislar fojiaga elektr tizimidagi nosozlik yoki muassasa rahbariyati tomonidan yong‘in xavfsizligi talablariga rioya etilmagani sabab bo‘lgan bo‘lishi mumkinligini tekshirishmoqda. Mazkur holat yuzasidan jinoiy ish qo‘zg‘atilgan bo‘lib, aybdor shaxslar qonun oldida javob berishi kutilmoqda.
Ushbu hodisa shahardagi boshqa ko‘ngilochar maskanlarda xavfsizlik choralarini qayta ko‘rib chiqish zarurligini ko‘rsatdi.
