Belarusda tug‘ilgan chaqaloq O‘zbekistonga olib kelinib qarindoshlariga topshirildi
Belarus Respublikasidagi tergov hibsxonasida saqlanayotgan O‘zbekiston fuqarosi bo‘lgan ayolning farzandi dunyoga keldi. Bu haqda Zamin.uz xabar berdi.
Mazkur voqeadan so‘ng barcha zaruriy huquqiy va konsullik amallari bajarilib, chaqaloq mamlakatimizga olib kelindi hamda yaqin qarindoshlari qaramog‘iga topshirildi. Ushbu xayrli ish haqida Oliy Majlisning Inson huquqlari bo‘yicha vakili matbuot xizmati rasmiy ma’lumot berdi.
Ma’lum qilinishicha, joriy yilning may oyida Ombudsman boshchiligidagi O‘zbekiston delegatsiyasi Minsk shahridagi tergov hibsxonasida bo‘lib, u yerda saqlanayotgan vatandoshlarimiz bilan yuzma-yuz muloqot o‘tkazgan. Uchrashuv davomida hibsxonada saqlanayotgan ayol o‘zining homilador ekanini va yaqin orada farzandli bo‘lishini bildirgan.
U hibsxona sharoitida go‘dakni parvarish qilish imkoniyatlari o‘ta cheklanganidan xavotir bildirib, chaqaloqni O‘zbekistondagi yaqinlari bag‘riga yuborishda amaliy yordam so‘ragan. Mazkur murojaat Ombudsman tomonidan darhol nazoratga olindi.
Bola dunyoga kelganidan keyin tegishli davlat idoralari, mamlakatimizning Belarusdagi elchixonasi hamda Mustaqil Davlatlar Hamdo‘stligining Inson huquqlari bo‘yicha komissiyasi bilan yaqin hamkorlik o‘rnatildi. Barcha huquqiy jarayonlar va konsullik tartib-taomillari qisqa muddatlarda hal etildi.
Natijada chaqaloqning O‘zbekistonga qaytarilishi uchun zarur bo‘lgan barcha hujjatlar rasmiylashtirildi. Joriy yilning iyul oyida go‘dak eson-omon yurtimizga olib kelinib, oila a’zolariga topshirildi.
Bu kabi tadbirlar xorijda qiyin ahvolga tushib qolgan vatandoshlarimizning, ayniqsa, voyaga yetmagan bolalarning huquq va manfaatlarini himoya qilish davlatimizning doimiy e’tiborida ekanini yana bir bor isbotladi. Hozirgi vaqtda bolaning ahvoli yaxshi va u yaqinlarining doimiy g‘amxo‘rligi ostida.
Ombudsman ushbu jarayon davlat organlarining o‘zaro muvofiqlashgan harakatlari natijasida muvaffaqiyatli yakunlanganini alohida qayd etdi. O‘zbekiston o‘z fuqarolarini dunyoning qaysi nuqtasida bo‘lishidan qat’i nazar, yolg‘iz tashlab qo‘ymaslik tamoyiliga sodiqligini namoyon etmoqda.
