O‘zbekiston va Belarus 100 million dollarlik loyihalarni amalga oshiradi

O‘zbekiston va Belarus o‘rtasidagi hamkorlik aloqalari yangi bosqichga ko‘tarilmoqda. Bu haqda Zamin.uz xabar berdi.

Bugungi kunda ikki davlat o‘rtasidagi munosabatlarning diqqat markazida mehnat migratsiyasini tizimli ravishda tashkil etish hamda hududlararo iqtisodiy aloqalarni mustahkamlash masalalari turibdi. Yaqinda Andijon viloyati hokimi Shuhrat Abdurahmonov va Belarus prezidenti Aleksandr Lukashenko o‘rtasida bo‘lib o‘tgan uchrashuvda o‘zbekistonlik mutaxassislar uchun yaratilayotgan sharoitlar hamda umumiy qiymati 100 million dollardan ortiq bo‘lgan yirik loyihalar atroflicha muhokama qilindi.

Ushbu uchrashuv va belgilangan yangi rejalar O‘zbekiston prezidenti Shavkat Mirziyoyevning joriy yilning iyul oyida Belarus Respublikasiga amalga oshirgan rasmiy tashrifi davomida erishilgan kelishuvlarning amaliy ifodasidir. Davlatimiz rahbari mehnat migratsiyasini xavfsiz va tartibli tashkil etish bo‘yicha aniq topshiriqlar bergan edi.

Mazkur jarayonlarni bevosita nazorat qilish va muvofiqlashtirish maqsadida yaqin kunlarda Vitebsk shahrida O‘zbekiston Migratsiya agentligining maxsus vakolatxonasi o‘z faoliyatini boshlaydi. Belarus rahbari Aleksandr Lukashenko o‘zbekistonlik ishchilar uchun mamlakatda barcha zarur qulayliklar yaratilishini alohida ta’kidlab o‘tdi.

Uning qayd etishicha, bu hamkorlik har ikki tomon uchun ham birdek manfaatli bo‘lib, Vitebsk viloyati iqtisodiyotining rivojlanishiga xizmat qiladi. Kelishuvga ko‘ra, Belarusda mehnat qiladigan barcha yurtdoshlarimiz bepul turar joy bilan ta’minlanadi.

Shuningdek, ishchilarning oila a’zolari va farzandlari uchun ijtimoiy himoya kafolatlanadi. Xususan, ularning farzandlari mahalliy bolalar bilan teng sharoitlarda maktab va bog‘chalarga qatnash imkoniyatiga ega bo‘ladi.

Mutaxassislar asosan qishloq xo‘jaligi, mahsulotlarni qayta ishlash, qurilish, sanoat va xizmat ko‘rsatish sohalariga jalb etiladi. Shuningdek, tibbiyot yo‘nalishida hamshiralik kabi o‘rta bo‘g‘in xodimlariga ham talab yuqori.

Rejaga ko‘ra, jami 5 ming nafar o‘zbekistonlik ishchi Belarusning Vitebsk va Mogilyov viloyatlariga yuboriladi. Hozirda Andijon viloyatidan dastlabki 255 nafar fuqaro Vitebsk viloyatiga yetib borgan va ish faoliyatini boshlashga tayyorgarlik ko‘rmoqda.

Ishchilarni jo‘natish jarayoni bir necha bosqichda amalga oshiriladi. Birinchi bosqichda tanlov asosida saralab olingan 1100 nafar fuqaro 13 ta yirik korxonaga joylashtiriladi.

Sentyabr oyidan boshlab esa har oyda 500 kishidan iborat guruhlarni yuborish rejalashtirilgan. Hamkorlik faqatgina ishchi kuchi bilan cheklanib qolmaydi.

Ikki davlat o‘rtasida iqtisodiy investitsiyalar kiritish va yangi logistika markazlarini barpo etish borasida ham faol ishlar olib borilmoqda. Bu kabi loyihalar O‘zbekiston va Belarus o‘rtasidagi do‘stona va strategik aloqalarni yanada mustahkamlashga xizmat qiladi.