Eron husiylarga Qizil dengizdagi neft yo‘llarini yopishni buyurdi
Eron hukumati Yamandagi husiylar harakatiga Qizil dengiz orqali o‘tuvchi strategik neft tashish yo‘llarini yopishga tayyor turish bo‘yicha ko‘rsatma bergani haqida ma’lumotlar tarqalmoqda. Bu haqda Zamin.uz xabar berdi.
Reuters axborot agentligi o‘zining ishonchli manbalariga tayanib xabar berishicha, ushbu chora AQSH tomonidan Eronning energetika infratuzilmasiga ehtimoliy harbiy zarbalar berilgan taqdirda javob tariqasida qo‘llanilishi ko‘zda tutilgan. Bunday reja Eron oliy rahbariyati darajasida batafsil muhokama qilingan va tegishli ko‘rsatmalar husiylar vakillariga yetkazilgan.
Hozircha ushbu xabarning AQSH prezidenti Donald Trampning so‘nggi bayonotlaridan keyin yoki undan oldin yuborilgani borasida aniq ma’lumotlar mavjud emas. Eron Tashqi ishlar vazirligi va husiylar harakati rasmiylari bu borada biron-bir izoh berishdan tiyilmoqda.
Olingan ma’lumotlarga ko‘ra, husiylar Bob al-Mandab bo‘g‘ozi atrofida raketa tizimlari va uchuvchisiz uchish qurilmalarini joylashtirib, ehtimoliy harbiy harakatlarga jiddiy tayyorgarlik ko‘rmoqda. Qurolli kuchlar asosan Hodeyda shahri va Adan ko‘rfaziga tutash hududlarda shay holatga keltirilgan bo‘lib, ular faqat markazdan beriladigan yakuniy buyruqni kutmoqda.
Mutaxassislarning fikricha, Qizil dengiz va Bob al-Mandab bo‘g‘ozidagi vaziyatning keskinlashishi jahon neft bozori uchun misli ko‘rilmagan xavf tug‘diradi. Agar mazkur yo‘nalishda yuk kemalari va tankerlar harakati cheklansa, bu global energiya ta’minotiga salbiy ta’sir ko‘rsatib, jahon bozorlarida yoqilg‘i narxlarining keskin ko‘tarilib ketishiga sabab bo‘lishi mumkin.
Shu bilan bir qatorda, husiylarga yaqin bo‘lgan manbalar Eron Islom inqilobi qo‘riqchilari korpusi vakillari Yamandagi harbiy vaziyatni bevosita kuzatib borayotganini tasdiqlamoqda. Strategik qarorlar ikki tomonlama muvofiqlashtirilgan holda qabul qilinayotgani aytilmoqda.
So‘nggi kunlarda mintaqadagi harbiy-siyosiy vaziyat yanada taranglashgani kuzatildi. Husiylar Saudiya Arabistoni hududiga qarata raketa hujumlarini amalga oshirgani haqida bayonot berishi bir necha yildan buyon davom etayotgan nisbiy barqarorlikka putur yetkazishi mumkin.
Tahlilchilarning xulosasiga ko‘ra, Qizil dengizdagi asosiy dengiz yo‘llarining xavf ostida qolishi nafaqat Yaqin Sharq mintaqasidagi tinchlikka, balki butun dunyo iqtisodiyoti va energetika xavfsizligiga jiddiy zarba bo‘ladi.
