«Ryanair» samolyoti oynasi sinishi oqibatida yo'lovchi tashqariga tortildi
Gretsiya osmonida Ryanair aviakompaniyasiga tegishli Boeing 737 NG rusumli samolyot ishtirokida yuz bergan favqulodda hodisa yo‘lovchilar orasida katta vahima keltirib chiqardi. Bu haqda Zamin.uz xabar berdi.
Parvoz davomida havo kemasi illyuminatorlaridan biri sinib ketishi oqibatida salonda bosim keskin pasayib ketgan. Buning natijasida yo‘lovchilardan biri kuchli havo oqimi ta’sirida qisman tashqariga tortilib ketgan.
Ma’lumotlarga ko‘ra, ushbu hodisa 10-iyul kuni Saloniki shahridan Germaniyaning Memmingen shahriga yo‘l olgan reysda sodir bo‘ldi. Samolyot havoga ko‘tarilganidan taxminan o‘n daqiqa o‘tgach, yo‘lovchilar kuchli portlashga o‘xshash tovushni eshitishgan.
Shundan so‘ng layner shoshilinch ravishda pastlay boshlagan. Illyuminator yonida o‘tirgan 61 yoshli Serbiya fuqarosi Lyubisha Karovich bosimning keskin o‘zgarishi sababli tashqi tomonga tortila boshlagan.
Uni orqasida o‘tirgan rafiqasi Svetlana Grkovich erining oyog‘idan ushlab qolishga ulgurgan, yonidagi boshqa bir yo‘lovchi esa jabrlanuvchining qo‘lidan mahkam tutgan. Keyinroq yana bir erkak yordamga kelib, ular birgalikda erkakni salon ichiga tortib olishga muvaffaq bo‘lishgan.
Mutaxassislarning ta’kidlashicha, erkakning xavfsizlik kamari taqilgan holatda bo‘lgani uning hayotini saqlab qolishda muhim omil bo‘lgan. Svetlana Grkovichning so‘zlariga ko‘ra, voqea davomida turmush o‘rtog‘i bir necha bor hushini yo‘qotgan.
Ayol o‘sha dahshatli daqiqalarni eslar ekan, agar vafot etishsa, birga o‘lishga tayyor bo‘lganini bildirdi. Uning ta’kidlashicha, jabrlanuvchining og‘zi va burnidan qon kelgan, biroq bort kuzatuvchilari tomonidan yetarli darajada yordam ko‘rsatilmagan.
Hatto ichish uchun suvni ham boshqa yo‘lovchilar olib kelib berishgan. Yo‘lovchilar singan oynani chamadon bilan to‘sishga harakat qilishgan, ammo kuchli havo oqimi uni ham tashqariga tortib ketgan.
Samolyot tez orada Saloniki aeroportiga qaytib keldi va xavfsiz tarzda yerga qo‘ndirildi. Lyubisha Karovich zudlik bilan shifoxonaga yetkazildi va hozirda muolajalar davom etmoqda.
Rafiqasining aytishicha, u og‘ir ruhiy zarba olgan, qo‘li jarohatlangan va hozircha yuz bergan voqealarni to‘liq eslay olmaydi. Dastlabki taxminlarga ko‘ra, ushbu hodisaga samolyotning o‘ng dvigatelidagi nosozlik sabab bo‘lgan bo‘lishi mumkin.
Ayrim mutaxassislar dvigateldan ajralib chiqqan bo‘lak illyuminatorga kelib urilganini taxmin qilmoqda. Biroq bu ma’lumot hozircha rasman tasdiqlanmagan.
Hozirda mazkur holat yuzasidan xalqaro tekshiruv ishlari boshlangan. Tergov jarayonida Amerika Qo‘shma Shtatlari Federal fuqaro aviatsiyasi boshqarmasi, Yevropa aviatsiya xavfsizligi agentligi, Gretsiya tegishli idoralari hamda Boeing kompaniyasi mutaxassislari ishtirok etmoqda.
Ryanair aviakompaniyasi esa qisqa bayonot berib, illyuminator shikastlangani sababli samolyot ortga qaytganini va yo‘lovchiga zarur tibbiy yordam ko‘rsatilganini ma’lum qildi.
