Fransiya parlamenti og‘ir bemorlar uchun evtanaziya to‘g‘risidagi qonunni ma’qulladi
Fransiya parlamenti quyi palatasi ogir bemorlarga hayotdan ixtiyoriy ravishda ko‘z yumishga ko‘maklashish, ya’ni evtanaziya huquqini joriy etuvchi qonun loyihasini ma’qulladi. Bu haqda Zamin.uz xabar berdi.
Bu haqda nufuzli Le Monde nashri ma’lumot tarqatdi. Mazkur hujjat mamlakat ijtimoiy hayotida muhim o‘zgarish yasashi kutilmoqda.
Yangi qonun talablariga ko‘ra, ushbu huquqdan faqat Fransiya fuqarolari yoki mamlakat hududida doimiy yashovchi voyaga yetgan shaxslar foydalanishi mumkin bo‘ladi. Evtanaziya faqat o‘ta og‘ir, davosiz kasallikka chalingan, kuchli jismoniy yoki ruhiy azob chekayotgan hamda og‘rig‘ini boshqa tibbiy usullar bilan yengillashtirish imkoni qolmagan bemorlarga nisbatan qo‘llanadi.
Bu jarayonning qat’iy tartib-qoidalari ishlab chiqilgan. Shuningdek, bemorning hayotdan ketish haqidagi qarori mutlaqo ixtiyoriy, ongli ravishda qabul qilingan va bir necha marotaba tasdiqlangan bo‘lishi shart.
Har bir holat bo‘yicha yakuniy xulosa shifokorlar hay’ati tomonidan atroflicha ko‘rib chiqiladi. Tibbiy amaliyotda o‘limga olib keluvchi maxsus dori vositalaridan foydalanish ko‘zda tutilgan.
Qonun loyihasini ovozga qo‘yish jarayonida 291 nafar deputat uni yoqlab chiqdi, 241 nafar parlament a’zosi esa qarshi ovoz berdi. Fransiya prezidenti Emmanuel Makron ushbu qarorni 2022-yilda saylovchilarga berilgan va’daning ijrosi sifatida baholadi.
Davlat rahbarining ta’kidlashicha, qonun atrofidagi muhokamalar o‘zaro hurmat va quruvchan ruhda o‘tgan. Hozirgi kunda dunyoning o‘n ikkita davlatida, jumladan, Shveysariya, Niderlandiya, Kanada, Ispaniya, Avstriya va Portugaliyada evtanaziyaga rasman ruxsat berilgan.
Yangi qonun to‘liq kuchga kirgach, Fransiya ushbu ro‘yxatdagi o‘n uchinchi mamlakatga aylanadi. Mutaxassislar ushbu amaliyotning bir necha shakllarini farqlashadi.
Masalan, bilvosita evtanaziyada kuchli dori vositalari o‘limni tezlashtirsa, passiv turida bemorni hayotda ushlab turgan tibbiy uskunalar uning xohishiga ko‘ra o‘chirib qo‘yiladi.
